سیګار: امریکا لاهم افغانستان کې پنځه فعالې سترې پروژې عملي کوي

د افغانستان پر بیا رغونې د امریکا د څار ځانګړې ادارې (سیګار) په خپل تازه راپور کې ویلي، چې د یاد هېواد مرستندویه اداره (یو.اېس.اې.آی.ډي) لا هم په افغانستان کې پنځه لویې پروژې عملي کوي،چې ټولې د زده کړو په برخه کې دي.

راپور کې راغلي، چې یادې پروژې د امریکا مرستندویه ادارې د ټولنیزو خدماتو ځانګړې برخې له خوا عملي کوي، چې ۲۰۱۴ کال پیل او ټاکلې شوې ده،چې د روان  ۲۰۲۳ کال تر پایه پورې به دوام وکړي.

د راپور یوه برخه:« د یادو فعالو پروژو د عملي کولو لپاره څه باندې ۱۶۵ میلیونه او ۶۰۰ زره ډالر ځانګړي شوي دي، چې تر دې دمه یې څه د پاسه ۱۳۱ میلیونه او ۵۰۰ زره ډالر لګول شوي دي. دا پروژې د نجونو پر زده کړو د طالبانو بندیزونو له امله مستقیما اغیزمنې شوي دي. یاد پروګرام اوس د نجونو د لوړو زده کړو ظرفیت لوړونې پر هغو برخو کار کوي، چې طالبانو نجونو ته مجاز ګڼلي دي.»

د اسلامي امارت په راتګ سره اوس د امریکا د زده کړو اړوند دا پروژې نجونو ته پر انلاین زده کړو او قابلګۍ برخه کې پر روزنو او زده کړو متمرکزې شوي دي.

د سیګار راپور پر بنسټ، د یادو ځانګړو شویو پیسو له ډلې تر ټولې ډېرې هغه یې افغانستان کې د زده کړو پر پیاوړتیا او تر ټولې کمې هغه یې بیا افغانستان کې د زده کوونکو بریا برخه کې لګول شوي دي.

د راپور یوه برخه:« افغانستان کې د زده کړو پیاوړتیا برخه: لګیدلې پیسې نږدې ۴۷ میلیونه او ۱۹۸ زره ډالر.

د ښوونځیو فعال ساتلو برخه: لګیدلې پیسې، ۴۰ میلیونه ډالر.

پریږدئ نجونې زده کړې وکړي پروګرام : لګیدلې پیسې، ۲۹ میلیونه ډالر.

افغانستان کې د زده کوونکو بریا ملاتړ برخه: لګیدلې پیسې، ۱۳ میلیونه ډالر

د افغانستان امریکایي پوهنتون تخنیکي ظرفیت لوړونې پروګرام، لګیدلې پیسې، څه باندې ۱۵ میلیونه او ۳۲۴ زره ډالر. »

د ۲۰۲۱ کال له تحول راورسته که څه هم د افغانستان امریکايي پوهنتون دوحې ته لیږدول شوی دی،خو د امریکا ځانګړې شوې پیسې لا هم ورکول کیږي.

سیګار افغانستان کې د امریکا د پوهنې برخې پروژو یادونه کوي،چې د یاد هېواد بهرنیو چارو وزات په کراتو ویلي،چې له  افغانانو سره لا هم تر ټولو ډېره بشري مرسته همدوی کوي.