Skip to content
وینډیرینګ اما سکاټلنډۍ ګرځندویه،چې د افغانستان له بېلابېلو او لرو پرتو سیمو یې لېدنه کړې، وايي،دا یې درېیم ځل دی،چې افغانستان ته راځي.
اما وايي،دلته ځان خوندي احساسوي،خو پر وینا یې د افغانانو ژوند او ورځنیو چارو له امله مایوسه ده.
هغې زیاته کړه:« دا مې درېیم ځل دی،چې افغانستان ته راځم. زه له افغانستان او خلکو سره یې مینه لرم. وخت غواړي،چې د افغانستان خلکو کلتور سره بلده شم. د کابل په ګډون د افغانستان ډېری ولایتونو ته تللې یم، خلک یې مینه ناک او مېلمه دوسته دي،خو خلک یې له سختو ستونزو سره مخ دي، چې ورته مایوسه یم.»
اما د نړۍ ډېرو هېوادونو ته تللې،د بېلابېلو قومونو او نژادونو خلکو سره غږېدلې ده.
اما د شمشاد خبریال د هغې پوښتنې په ځواب کې چې له تاسو سره د افغانستان خلکو چلن څنګه وو؟
داسې وویل:« په ځایونو او سیمو پورې یې تړاو درلود، په ځینو سیمو کې خلکو خوښول، چې زه ویډیو وکړم او ژوند يې انعکاس کړم. په ټوله کې افغانان مېلمه دوسته دي، خو په ځینو سیمو کې محدودیتونه ول، دوی نه خوښول،چې ویډیو وکړم او ورسره کېنم.»
ننګرهار، بامیان، هلمند، کندهار او هرات هغه ولایتونه وو،چې اما په کې د افغانانو د کلتور او ورځینو چارو په اړه پوښتنې کړي ا و د ویډیو له لارې یې نړیوالو ته ښودلي دي.
اما وايي،افغان نجونې د زده کړو تږې دي، ډېر کله يې له نجونو د زده کړو په اړه پوښتلي او همدا یې غوښتنه ده، چې زده کړې وکړي.
هغه زیاتوي:« د ښځو په برخه کې ستونزې شته دي، د زده کړو اسانتیاوې ورته نه دي برابر شوي، افغان مېرمنې د زده کړو تږې دي. د افغان نجونو وروڼو راته وویل، هره ورځ یې خویندې ژاړي،چې ولې زده کړو ته نه پرېښودل کېږي؟ افغان نجونې هېله لري،چې زده کړې وکړي او راتلونکي کې د افغانستان لپاره خدمت وکړي.»
نور بهرني ګرځندویان هم په افغانستان کې اوس شتون لري،د افغانستان بېلابېلو سیمو ته تګ کوي،خو اما بیا له هغو یوه ده،چې د افغانستان په کلو او ښارونو کې یوازې ګرځي او د افغانانو ورځینی ژوند یې لیدلی.
اما وايي، د نړۍ ۳۲ هېوادونه یې کتلي، خو د افغانستان په څېر هېواد چې ۴۰ کاله جګړو وځاپه د خوښې هېواد یې دی او ډېرې خاطرې او کیسې له دې هېواده لري.
