د امریکا د کورني امنیت وزارت له هغه خبرداري وروسته چې له مخې يې ښايي د لنډمهاله خوندیتوب طرحې پر بنسټ امریکا ته لېږدول شوي ۱۴زره ۶۰۰ افغان کډوال چې اوس یې د لنډمهاله مېشتېدنې موده بشپړه شوې، له دې هېواده وايستل شي.
تازه سپینې ماڼۍ ویلي، د دغو کډوالو د برخلیک په تړاو به ځانګړې محکمه پرېکړه کوي.
د سپینې ماڼۍ ویاندې په خپل وروستي خبري کنفرانس کې چې په امریکا کې د غیرقانوني کډوالو شمېر سلګونه زره تنه ښيي ویلي، د دغو غیر قانوني کډوالو کېسونه به د قاضي له لوري وڅېړل شي.
کارولین لیوېټ د بایډن پر مشرۍ د امریکا په تېر حکومت نیوکه کړې چې کواګي یاد شمېر پناه غوښتونکي یې په غیر قانوني ډول امریکا ته راوستلي او اوس د ډیپورټ کېدو له ګواښ سره مخ دي.
لیوېټ په دې اړه ویلي:« یو څه باید روښانه شي، هغه دا چې موږ دغه پروسه نه ده درولې بلکې وخت یې پای ته رسېدلی. دا ځکه چې تېرې ادارې په غیر قانوني ډول سلګونه زره کسان امریکا ته راوستل او وروسته یې هغوی ته د لنډمهاله اوسېدنې شرایط برابر کړل. بیا ځلې یې تکرارم، هغه څه چې لنډمهاله طرحه وه او دایمي نه وه. که داسې کسان وي چې د ولسمشر بایډن په اداره کې دلته راغلي وي او د پناهغوښتنې په لټه کې وي؛ نو له قانوني پروسو او لارو باید مخکې لاړ شي. د هغوی کېسونه به یو- یو د قاضي له خوا وڅېړل شي.»
له دې وړاندې د امریکا کورني امنیت وزارت افغان او کامروني کډوالو ته خبرداری ورکړی و چې تر راتلونکې مې میاشتې وخت لري، ترڅو له امریکا بهر ځان ته د اوسېدو شرایط برابر کړي.
امریکا د هغو هېوادونو اوسېدونکو ته له شپږو تر اتلسو میاشتو د لنډمهاله مېشتېدنې شرایط برابروي چې د بشري ناوړه وضعیت، جګړې او طبیعي پېښه له ګواښ سره مخ وي.
د کډوالو د حقونو فعال عبدالرازق عدیل وايي: « دغه ګام کولی شي د کډوالو او بشري حقونو د دفاع په تړاو د امریکا موقف کمزوری کړي او دغه راز د هېواد په داخل کې د اقتصادي او ټولنیزو ستونزو یوه لویه څپه رامنځته کړي. ویلی شو چې دغه سیاست له یوې خوا د غیر قانوني مهاجرت د کنټرول او د ټي.پي.اېس قانوني معیارونو د بیا کتنې لپاره مطرح کېږي، خو له بلې خوا کولی شي د نړۍ پر کچه پراخې منفي اقتصادي، انساني او ټولنیزې پایلې ولري.»
په تېرې جنورۍ میاشت کې واک ته د ډونالډ ټرمپ له بیاځل واک ته رسېدو او تر هغې وړاندې په ټاکنیزو کمپاینونو کې نوموړي تل د غیرقانوني کډوالو د ډېپورټ کولو دریځ نیولی و.
د کډوالو د حقونو فعالان وايي، ځانګړې محکمې ته د افغان کډوالو د قضیو راجع کول کولی شي د هغوی کېسونه لاپيچلي او ستونزمن کړي.
د کډوالو چارو فعال علیرضا کریمي وايي: « دا چې اوس د مهاجرتي دوسیو څېړل محکمې ته سپارل شوي، دغه ګام کولی شي د کېسونو څېړنه لاپېچلې کړي. دا بدلونونه د کډوالو لپاره نا مشخصې پایلې لري او ښايي ځینې دوسیې له سخت حالت سره مخ کړي. په ټولیزه توګه، دغه پروسه تر ډېره د کډوالۍ په تړاو د ټرمپ او د هغه د دولت سختګیرانه پالیسي ګڼل کېږي.»
دا داسې مهال ده چې د امریکايي اسلامي اړیکو شورا د امریکا د کورني امنیت وزارت له خبردراي وروسته دغه پرېکړه د کډوالۍ ضد اجنډا، ظالمانه او ګواښوونکې بللې وه.
یادې شورا په دې تړاو یوه اعلامیه خپره کړه او وویل، له جګړو او نورو ګواښوونو پناه غوښتنې ته اړ شویو کډوالو بېرته ستنول او یا یې له امریکا شړل، د هغوی ژوند له ګواښ سره مخامخ کوي.
