Skip to content
د ناټو سرمنشي ینس سټولټنبرګ، په وروستۍ بېړنۍ ناسته کې وویل، غړي هېوادونه ټينګار لري،چې طالبان باید ترهګرو ته اجازه ورنه کړي، چې له افغان خاورې نړیوالو ته ګواښ پیښ کړي.
سټولټنبرګ ویلي، دا د منلو وړ نه ده چې افغانستان دې یو ځل بیا د ترهګرو پر پټنځای بدل شي.
سټولټنبرګ زیاتوي: «اوس موږ او د ناټو غړي هېوادونه طالبان مسوول ګڼي، چې د ترهګرۍ پر وړاندې کړې ژمنې عملي کړي. افغانستان د نړیوالې ترهګرۍ پر مرکز بدل نه شي او د بشر حقونو د خوندیتوب په تړاو چې یې کومې ژمنې کړي، هغه هم په عمل کې ثابت کړي. موږ دا هڅه هم کوو چې له ګواښ سره مخ کسان وباسو.»
سټولټنبرګ په افغانستان کې د خپل نظامي ماموریت پای ته رسول سخته پریکړه وبلله، خو په وینا یې د پاتې کېدو پرېکړه تر هغې هم ګرانه وه.
اخوا روسیې او تاجکستان احتمالي ترهګریزو ګواښونو ته خپل تدابیر زیات کړي او د افغانستان او تاجکستان ګډې پولې ته یې پوځي تمرینات لا ګړندي کړي دي.
د تاجکستان دفاع وزیر شیرعلي میرزو وايي، د طالبانو واکمن کېدو سره افغانستان کې یو شمیر ترهګرې ډلې فعالې شوې دي او په ټوله سیمه کې د ویجاړۍ او ورانکارۍ اراده لري.
میرزو زیاته کړه: «د طالبانو له واک ته رسېدو وروسته ترهګرې ډلې فعالې شوې دي. هغوی پر پرمختللو وسلو سمبال دي او له خپلو پټن ځایونو هر لور ته خوځيدلي دي. هغوی غواړي چې له افغانستان څخه د ټولې د سیمې د نا امنه کولو او ویجاړولو لپاره ګټه پورته کړي.»
د روسيې وسله وال ځواک قوماندان یوجیني پوپلواسکي ویلي، طالبان غواړي له افغانستان څخه نورې سخت دریځې ډلې وباسي او هغه به هرومرو د تاجکستان لور ته وغځيږي.
پوپلواسکي وايي :«طالبان هڅه کوي چې داعش او نورې ترهګرې ډلې له خپلې خاورې وباسي او نورو هېوادونو ته یې وشړي. موږ د همدې له امله اندیښمن یو،چې دغه سخت دریځې ډلې به د تاجکستان خاورې ته راننوځي.»
روسیه او تاجکستان دا پوځي تمرینات داسې مهال پیلوي چې وړمه ورځ د روسیې د بهرنیو چارو وزیر له طالب مشرانو سره په خبرو کې هم له افغانستان څخه د هغوی خاورې ته دترهګرۍ د ګواښ پیښیدو اندیښنه څرګنده کړې وه.
