د ناټو عمومي منشي ینس سټولټنبرګ وايي، باوري دی،چې افغان امنیتي ځواکونه به د بهرنیو ځواکونو له بشپړ وتلو وروسته هم د خپل هېواد امنیت او سوله تامین کړي.
سټولټنبرګ وايي، اوس مهال غړي هېوادونه له افغانستانه بهر افغان امنیتي ځواکونو ته د روزنې ورکولو پر مشورو بوخت دي.
هغه له اسوشیټیډ پرس سره په مرکه کې ویلي، افغانستان کې خپل پوځي ماموریت پاېته رسوي، خو له دې هېواد سره به یې په ملکي او پوځي برخو کې مرستې دوام ولري.
د ناټو عمومي منشي ینس سټولټنبرګ وايي:« افغانانو په تېرو شلو کلونو کې اوږد مزل کړی دی. دوی له پوځي پرمختګ سربېره په ټولنیزو او اقتصادي برخو کې هم د پام وړ لاسته راوړنې لري. اوس د دې وخت دی،چې افغانان په خپله د هېواد سولې او امنیت ټینګښت مسوولیت واخلي.»
سټولټنبرګ ویلي، له افغان حکومت سره به د سلا مشورو، ملکيانو سره د مرستو او د افغان امنتیي ځواکونو د مالي ملاتړ او همدا راز د سولې بهیر چټکتیا په برخه کې به خپلو مرستو او ملاتړ ته دوام ورکړي.
هغه افغانستان کې د پاتې کېدو پوښتنې په ځواب کې وویل، دا پریکړه به یې له سترو خطرونو سره مل وي.
سټولټنبرګ زیاته کړه: «که موږ افغانستان کې د پاتې کېدو پریکړه وکړو،دا به له لویو ګواښونو سره مله وي. دا ګواښونه د جګړې شدت، د ځواکونو زیاتول او افغانستان کې بیا د جګړېز ماموریت پیل کول دي.»
د ناټو عمومي منشي ویلي، په پام کې لري،چې افغان امنتیي ځواکونو ته له افغانستانه بهر روزنه ورکړي، خو په وینا یې په دې اړه یې تر اوسه سلا مشورې وروستۍ شوې نه دي
بل پلو یو شمېر هېوادونه که څه هم د بهرنیو سرتېرو له وتلو وروسته افغانستان کې د بهرنیو سفارتونو د امنیت په اړه اندیښنه ښودلې،خو سټولټنبرګ ویلي، د کابل هوایي ډګر خوندي ساتلو لپاره هر ډول مالي او لوجیسټیکي مرستې کوي.
