د ناټو عمومي منشي ینس سټولټنبرګ ویلي، افغان حکومت د بهرنیو ځواکونو له وتلو وروسته د هوايي ډګرونو د امنیت مسوولیت اخیستو لپاره کلک تدابیر لري.
سټولټنبرګ ویلي، د کابل نړیوال هوايي ډګر او بهرنیو سفارت خونو په ګډون د مهمو بنسټیزو تأسیساتو د امنیت د خوندي کولو پر سر خپلو متحدینو سره بحثونه کوي.
سټولټنبرګ زیاته کړه:« موږ په دې اړه چې د کابل نړیوال هوایي ډګر په څېر، مهم بنسټیز تأسیسات په څه ډول ساتلی او مراقبتیې کولای شو د ناټو له متحدینو سره په ګډه پرې کار کوو او په دې اړه مو کار پیل کړی دی. یو خوا دا هغه څه دي چې ناټو یې ملاتړ کوي او له بلې خوا موږ په دې اړه څېړنې کوو چې د ناټو متحدین څه ډول کولای شي چې په دې برخه کې مهم رول ولوبوي.»
د پوځي چارو یو شمېر شنوونکي بیا وايي، ناټو او متحدین یې په افغانستان کې د مهمو تاسیساتو او هوايي ډګرونو د امنیت په تړاو اندیښنه لري.
په همدې حال کې د ملکي هوايي چلند اداره وايي٬ د بهرنیو ځواکونو له وتلو وروسته د ټولو هوايي ډګرونو د مسولیت اخېستلو ته چمتو دي او ددې بهیر له پیل څخه د یو شمېر هوايي ډګرونو مسولیت ورسپال شوی هم دی.
افغان حکومت وایي، د بهرنیانو له وتلو وروسته به هوایي ډګرونه، فعال او پر خپل حال پاتې وي.
د ملي امنیت شورا ویلي، افغان ځواکونو ته د بهرنیو ځواکونو د پوځي اډو او هوایي ډګرونو د انتقال پروسه له نږدې څاري او د مسوولیت اخېستلو ته یې بشپړ تدابیر لري.
