پاکستان بلاخره ومنله چې له افغانستان سره د هر ډول ستونزو حل په موخه اړتیا ده د جګړې پر ځای خبرې وشي.
دفاع وزیر يې وایي، که څومره هم جګړې یا نور تاوتریخوالی وشي، خو ستونزې بیا هم په خبرو حل کېږي.
خواجه اصف د پاکستانۍ له جیو نیوز ټلوېزيون سره مرکه کې زیاته کړې، که څه هم د اختلافونو حل د خبرو له لارې ستونزمن دی، خو تاریخي تجربې ښيي چې ډېری لویې شخړې د مذاکراتو له لارې حل شوې دي.
د پاکستان دفاع وزیر زیاته کړې: « په اوسنیو شرایطو کې که څه هم سخته ده چې د خبرو له لارې ستونزه حل شي، خو بیا هم هڅه کوو چې دا هر څه د خبرو له لارې حل شي. که تاسو نړۍ کې د جګړو تاریخ ته پام وکړی، که څه هم جګړې شوي، خو بیا یې هم حل په خبرو شوی. هرڅومره چې جګړې کېږي، بیا یې هم حل لاره خبرې دي.»
خواجه اصف همدارنګه ویلي، اسلاماباد له اسلامي امارت سره د تاوتریخوالي کمولو په موخه د خبرو اترو بهیر له بېلابېلو لارو روان ساتلی او هڅه کوي چې د دواړو لورو ترمنځ د کنټرول وړ همغږۍ زمینه برابره کړي.
هغه ټینګار کړی چې تېرو کلونو کې له اسلامي امارت سره څو پړاوه مذاکرات ترسره شوي او هڅه شوې چې اړیکې له ترینګلتیا څخه د تفاهم پر لور روانې شي.
نوموړي دا هم ویلي چې د دې خبرو موخه د داسې شرایطو رامنځته کول دي چې هېڅ لوری د بل لوري تر فشار لاندې نه وي او دواړه خواوې وکولی شي خپل سیاسي او امنیتي مسیر په خپلواکه توګه تعقیب کړي.
پخوانی ډېپلوماټ عزیز معارج وايي: « که څه هم پاکستاني چارواکي تل د سولې، ثبات، ښو اړیکو او د خبرو له لارې د ستونزو حلولو خبره کوي مګر عمل پرې نه کوي بلکې په عملي توګه له زور څخه کار اخلي. اوس نه افغانستان او نه د نړۍ هېوادونه د پاکستان په دې خبرو باور کوي. ښايي پاکستان اوس مجبور شوی وي چې ستونزې د خبرو له لارې حل کړي.»
د چارو څارونکي د افغانستان او پاکستان ترمنځ د ستونزو حل په موخه خبرې جدي اړتیا بولي او وایي، که پاکستان له افغانستان سره خپلې ستونزې د خبرو له لارې حل نهکړي، ښایي لا ډېرو جدي ننګونو سره مخ شي.
د سیاسي چارو شنونکی معین ګل څمکنی وايي: « دا پاکستاني چارواکو دا ډول څرګندونې یوه اړتیا ده. هم افغانستان، هم پاکستان او هم د سیمې هېوادونه ټول سولې او ثبات ته اړتیا لري. د ټيټيپي د تمویل ستونزه هسې بهانه ده، اصلي خبره دا ده چې پاکستان خپلې ستونزې نه شي حلولی یا قصدا ً نه غواړي ستونزې هوارې کړي.»
که څه هم اسلامي امارت د پاکستان دفاع وزیر تازه څرګندونو په تړاو څه نهدي ویلي، خو په تېر کې له پاکستان سره بیا بیا په قطر، سعودي عرب، ترکیې او چین کې خبرې شوې مګر لا هم پاکستان هغه څه نهدي عملي کړي چې ستونزې ورسره حل کېدای شي.
