د سوداګرۍ خونې وايي، هر څه عادي حالت ته ګرځېدلي او خلک دې د توکو بیې نه لوړوي.
د افغانستان د صنعت او سوداګرۍ وزارت په يوه اعلاميه کې ويلي دي، چې د بندرونو له لارې د توکو ليږد راليږد نورمال حالت ته ګرځېدلى دى او هېوادوال دې د توکو د کمښت اندېښنه نه کوي.
د افغانستان د سوداګرۍ او پانګونې خونې ويلي، چې د دوى په هڅو او د ټرانسپورټ وزارت په همکارۍ له ترکمنستان سره د بندرونو له لارې د توکو ليږد راليږد عادي حالت ته راګرځېدلى او تګ راتګ جريان لري.
په اعلامیه کې راغلي چې د اتاق غړي او متشبثين هڅه کوي چې د ډېرو توکو په وارداتو سره د بيو د لوړوالي مخنيوى وکړي.
دا په داسې حال کې ده چې د کورونا ويروس او له دې ويرې چې له نورو هېوادونو سره به ټولې لارې وتړل شي، په پلازمېنه کابل او ځينو ولايتونو کې د خوراکي توکو بيې لوړې شوې دي.
په کابل او جلال اباد کې بيا خلک له دې حالته سر ټکوي او وايي، چې دوکانداران او سوداګر خلک لوټي او بايد حکومت د بيو د لوړولو مخنيوى وکړي.
په ټولنيزو رسنيو کې هم خلکو د بيو د لوړولو په اړه نيوکې کړې دي.
