د سوداګرۍ او پانګونې خونې چارواکي وايي، سلګونه دولتي کارکوونکو او بې وزله کورنیو ته یې د خوراکې توکو وېش لړۍ پیل کړه.
د دوی په خبره، دا مرستې له یو شمېر پانګوالو راغونډې شوې وې او پر شاوخوا ۱۰۰۰ کورنیو او دولتي مامورینو به ووېشل شي.
د سوداګرۍ او پانګونې خونې د مدیره پلاوي مشر محمد ولي امیني له نورو پانګوالو هم غواړي چې په روژه کې خپلې مرستې له بېوزلو ونه سپموي.
امیني زیاتوي: « لکه څرنګه چې تاسو په جریان کې یاست، د افغانستان د سوداګرۍ او پانګونې خونې د مدیره پلاوي او تاجرانو له لوري د روژې مبارکې میاشتې په اوږدو کې له بېوزله او اړمنو کسانو سره د مرستو په موخه یوه اندازه نغدې پیسې راټولې کړې. په دغو پیسو به شاوخوا ۱۰۰۰ کورنیو ته خوراکي توکي وپېرل او ووېشل شي. د خوراکي توکو په دې مرستو کې به اوړه، غوړي او لوبیا شامل وي. همدارنګه پنځه سوه نورو کورنیو ته هم نغدي مالي مرستې رسوو.»
له بلې خوا، د دغو مرستو تر لاسه کوونکي هم له شویو مرستو خوښ دي او وايي، تر يوه حده به يې ګوزاره پرې وشي.
یو تن مرسته اخستونکی وايي: « د افغانستان سوداګرۍ او پانګونې خونې له رمضاني مرستو څخه مننه کوم. له له نورو سوداګرو او شتمنو کسانو هم غوښتنه کوم چې د روژې په میاشت کې د بېوزلانو لاسنیوی وکړي.»
یو تن بل مرسته اخستونکی وايي: « موږ له دغو مرستو ډېره مننه کوو. همدارنګه له هغو سوداګرو هم مننه کوو چې دا مرستې یې چمتو کړې دي. موږ له نورو سوداګرو هم د ورته ګام هیله لرو.»
دا په داسې حال کې ده چې افغانستان ته له ګاونډیو هېوادونو څخه د میلیونونه کډوالو راستنېدل، طبیعي پېښې او دغه راز دوامداره وچکالۍ د دې سبب شوې دي چې ډېری خلک له اقتصادي ستونزو سره مخ شي او مرستو ته اړتیا ولري.
