په دې وروستیو کې داسې راپورونه خپاره شول چې ګواکې ملګرو ملتونو د سرپرست حکومت استازي ته په دې سازمان کې د افغانستان څوکۍ په اړه له ځينو چارواکو سره خبرې کړې.
تازه په قطر کې د اسلامي امارت شارژدافیر محمد سهیل شاهین چې په ورته وخت کې د سرپرست حکومت له خوا په ملګرو ملتونو کې د افغانستان استازيتوب ته هم نومول شوی، دا خبرې ښه اقدام ګڼي او وایي، له سرپرست حکومت سره د ستونزو حل او مثبت تعامل لپاره دې په ملګرو ملتونو کې د افغانستان څوکۍ ور وسپارل شي.
شاهین په ياد سازمان کې د اسلامي امارت د استازي موجوديت مهم بللی او په خبره يې، په دې توګه کېدای شي د افغانستان په اړه د نړيوالو موجوده اندېښنو ته معقول ځواب وويل شي.
شاهین په دې اړه وايي: « ملګري ملتونه هم باید د مسایلو د حل او مثبت تعامل په خاطر په ملګرو ملتونو کې د افغانستان څوکۍ اسلامي امارت ته وسپاري؛ ترڅو د ملګرو ملتونو پیغام د اسلامي امارت اړوند مشرانو ته او د اسلامي امارت د مشرانو پیغام د ملګرو ملتونو اړوند چارواکو ته په خپل وخت ورسېږي. دغه کار به د مسایلو په حل او توضېح کولو کې پرمختګ رامنځته کړي.»
سرپرست حکومت په کراتو له نړیوالې ټولنې غوښتي چې ملګرو ملتونو کې دې د افغانستان څوکۍ ور وسپاري، خو د څو کلونو په تېرېدو سربېره هم د حکومت دا غوښتنه نه ده منل شوې.
د سیاسي چارو شنونکي هم په ملګرو ملتونو کې سرپرست حکومت ته د افغانستان څوکۍ سپارل له هېوادونو سره د تعامل په زياتوالي کې مهمه بولي او دا کار د افغانستان او نړيوالو پر ګټه يادوي.
د سیاسي چارو شنونکی محمد سلیم پیګیر وايي: « هر وخت چې موږ په داخل کې اصلاحات راولو، یو قانونمند نظام ولرو، د نړیوالې ټولنې هغه فرمایشونه ومنو چې د افغانستان د خلکو او اسلام دین پر ګټه دي، زه باور لرم چې ملګري ملتونه به د افغانستان اسلامي امارت پر رسمیت وپېژني.»
له دې سره، پوښتنه دا ده چې ولې تر اوسه دغه څوکۍ سرپرست حکومت نه ده سپارل شوې او اساسي ستونزه څه ده؟
د چارو شنونکی توریالی ځاځی وايي: « طالبان باید د نړۍ د هېوادونو، ملګرو ملتونو او د خپل ولس مشروع غوښتنې ومني، ترڅو دغه ستره ستونزه حل شي. باید د نجونو د ښوونځیو دروازې پرانیستل شي.»
د نړیوالو اړیکو کارپوه نجیب الرحمن شمال وايي: « دا غوښتنه په داسې حال کې ده چې د ملګرو ملتونو په امنیت شورا کې د افغانستان په تړاو واحد لیدلوری نه شته، ترڅو د اسلامي امارت استازی په ملګرو ملتونو کې د افغانستان د استازي په توګه ومني.»
ملګرو ملتونو او نړيوالې ټولنې د بشري حقونو تحقق، د مذاکراتو په پایله کې د ټول ګډونه حکومت رامنځته کول، د نورو پر ضد د افغانستان خاورې نه کارېدل، له ترهګرۍ او نشه يي توکو سره پرېکنده مبارزه او يو شمېر نور مهم شرطونو د حکومت د رسميت پېژندنې په موخه د اسلامي امارت پر مېز اېښي دي.
د شنونکو باور دا دی چې په ملګرو ملتونو کې د افغانستان څوکۍ اوسني سرپرست حکومت ته سپارل هم ښايي د يادو شرطونو په منلو پورې تړل شوي وي.
