هندي سنډې ګارډين ورځپاڼې د دې هېواد د بهرنیو چارو وزارت چارواکو له قوله راپور ورکړی چې د افغانستان سرپرست حکومت نوي ډهلي ته د درېيو نورو ډېپلوماټانو د لېږلو هوډ لري.
سرپرست حکومت د تېرکال په نومبر کې اکرام الدين کامل په ممبی کې د افغانستان کونسلګرۍ ته د جنرال کونسل په توګه معرفي کړ.
خو سنډې ګارډين ته هندي چارواکو ويلي، نوي معرفي کېدونکي ډيپلوماټان به په نوي ډهلي کې د افغانستان سفارت د چارو پرمخ وړلو مسووليت ولري.
د راپور یوه برخه: « کابل ښايي په هند کې د افغانستان سفارت چارو مخته وړلو او کنټرول لپاره درې نوي ډېپلوماټان ډهلي ته واستوي. باوري سرچینې وايي، د نجیب شاهین په ګډون چې د سهېل شاهین زوی دی، د بهرنيو چارو وزارت د لومړي سیاسي مرستیال محمد نعیم نعمان، معصوم عاصم او صفي الله جبارخېل چې د پلټنې عالي ادارې غړي دي، د ډېپلوماټانو په توګه نوي ډهلي ته واستول شي.»
خو د بهرنيو چارو وزارت تر اوسه پورې هند ته د نويو ډېپلوماټانو د لېږلو په تړاو څه نه دې ويلي.
د سیاسي چارو شنونکي وايي، دا چې هند په سيمه کې له ډېرو هېوادونو سره ښې اړيکې لري، نو له همدې کبله افغانستان ته په کار دي چې اړيکې ورسره ټينګې کړي.
د سياسي چارو شنونکی اختر محمد راسخ وايي:« هندوستان هغه هېواد دی چې له شرق او غرب یا روس او امریکا سره ښې اړیکې لري، ښه ډېپلوماټیکه ژبه لري او په سیاسي ډګر کې یې هغه لاره خپله کړې چې په سیمه او نړۍ کې یې د دوی کړنې د بشري حقونو او ډېپلوماټیکو لارو له آدرسه تایید کېږي.»
ځينې نور بیا وايي، هند له کلونو راهیسې له افغانستان سره فرهنګي او تاریخي اړیکې لري او تر ډېره بریده افغانستان ته ښه نیت لري.
دوی زیاتوي چې سرپرست حکومت دې هم له دې فرصت ښه ګټه پورته کړي.
د پوهنتون استاد فیض محمد ځلاند وايي: « افغانستان په تاریخي لحاظ په ټولنیزه او کولتوري برخو کې، یا له سیمې سره د همغږۍ په برخه کې له هند سره تاریخي راکړه ورکړه او ډېپلوماټیکې اړیکې لري.»
د شنونکو په باور، هند د افغانستان لپاره د سیاسي اړیکو ترڅنګ پر سوداګرۍ کې هم مهم دی او د نويو ډېپلوماټانو په ورتګ سره به د کابل او نوي ډهلي اړيکې پراخې شي.
د سیاسي چارو شنونکی شهسوار سنګروال وايي: « هند او افغانستان د تاریخ په اوږدو کې نږدې دوستي لري. هند کله هم د افغانستان په کورنیو چارو کې لاسوهنه نه ده کړې، بلکې تل یې له افغانستان سره سیاسي او اقتصادي مرسته کړې.»
واک ته د سرپرست حکومت له رسېدو وروسته یې هڅه کړې چې په نورو هېوادونو کې د افغانستان سیاسي استازولۍ تر خپل کنټرول لاندې راولي. له دې مخکې چارواکو په ځلونو ویلي چې په نورو هېوادونو کې د افغانستان نږدې ۴۰ سیاسي استازولۍ د دوی په واک دي.
