مشرانو جرګه وايي، پر طالبان دې فشارونه زیات شي چې سولې ته غاړه کېږدي.
پر طالبانو دې سیاسي او نظامي فشار راوړل شي چې له افغان حکومت سره مخامخ خبرو ته حاضر شي.
د مشرانو جرګې غړي وايي، د فشار ښه لار دا ده چې افغان ځواکونه پر طالبانو بریدونه زیات کړي او امریکا دې پرپاکستان فشار راوړي .
په ورته وخت کې د جرګې ځینو غړو وویل ، حکومت دې لومړی د خلکو امنیت ونیسي او بیا دې ولسمشریزې ټاکنې وکړي .
د مشرانو جرګې د سه شنبې ورځې غونډې په امتیازي ساعت کې پر بیلا بیلو موضوعاتو بحث او خبرې وشوې .
سناتوران وايي لکه په اویایمو کلونو کې د مجاهدینو په څير طالبان هم اوس له افغان حکومت سره د سولې خبرې نه کوي .
ځینو ویل چې امریکا باید پر پاکستان فشار راوړي څو طالبان افغان حکومت سره مخامخ خبرو ته کینوي خو ځينې نور بیا وايي چې افغان حکومت دې له پوځي لارې طالبان تر فشار لاندې ونیسي.
د مشرانو جرګې غړو وویل ډیرې سیمې د طالبانو په واک کې دي او ترهغې چې د حکومت تر ولکې لاندې بیرته رانه شي او د خلکو امنیت خوندي نه شي ولسمشریزې ټاکنې دې نه کوي.
د مشرانو جرګې رییس بیا د کورنیو چارو وزارت په هغه اقدام نیوکه وکړه چې دغلو او اختطاف کوونکو یو لیست یې خپور کړی او د نیولو په برخه کې یې له خلکو مرسته غوښتې ده .
تازه کورنیو چارو وزارت د غلو ، اختطاف کوونکو او قاچبرانو یو دوه سوه کسیز لیست خپور کړی چې د ټولو ولایتونو هغه کسان پکې شامل دي چې د قانون خلاف کړنې کوي او د دغو کسانو د نیولو لپاره یې له خلکو مرسته غوښتې ده .
