د سمنګان ولایت ځايي چارواکي وايي، د جمعې په ورځ(د سلواغې ۲۶ مه) د دغه ولایت په مرکز ایبک ښار کې د یوه جامع جومات ته لاسي بم غورځول شوی چې له امله یې څلور تنه ټپيان شوې.
د دغه ولایت امنیې قوماندانۍ ویاند حشمت الله رحماني شمشاد ته ویلي، پېښه د دوو کسانو د شخصي دوښمنۍ له امله رامنځته شوې او یوه تن په جومات کې پر لمونځ کوونکو لاسي بم غورځولی دی.
د رحماني په خبره، په دې پېښه کې ښکېل کسان نیول شوې دي.
رحماني زیاتوي:« نن غرمه (د سلواغې ۲۶ مه) د سمنګان ولایت د مرکز ایبک ښار په جوی زندان جومات کې د جمعې لمانځه اداء کولو پرمهال، دوو تنو چې د همدې کلي اوسېدونکي دي، د جومات له خلکو سره د پخوانۍ دوښمنۍ لرلو له امله، یو لاسي بم جومات ته ور غورځولی چې له امله یې څلور تنه لمونځ کوونکي ژوبل شوې دي. له اطلاع وروسته د اېبک ښار امنیهېقوماندانۍ د درېیمې حوزې پرسونل ساحې ته رسېدلي او هغه کسان یې د تښتې پرمهال له یو میل وسلې سره یوځای نیولي چې دغه برید یې ترسره کړی و. نیول شوي کسان د لا ډېرو څېړنو په موخه تر توقیف لاندې دي او په برید کې ژوبل شوي کسان د درملنې په موخه د بلخ ولایت روغتون ته لېږدول شويېدي.»
