سمنګان ولایت کې هغو ځوانانو ته چې د بي روزګارۍ له امله د هېواد پرېښودو ته اړ شوي، تازه واړه کاروبارونه برابر شوې.
مسوولین وايي، که له یوه لورې یې سلګونه ځوانان په کار کړي خو بل لورته یې بیا ښاري نظم، د ښار ودانول هم له پامه نه دي غورځولي.
د سمنګان ولایت خلم ولسوالۍ ښاروال وايي:« وتوانېدلم چې له ۵۰۰ زیاتو ناچاره او بې وزله ځوانانو ته کوچني کاروبارونه ایجاد کړم، ځکه هېواد کې مو لوی تحول رامنځته شو چې ورسره ګڼ کسان بې کاره او زیانمن شوي وو. ما چې دغه کسان په کار کړل نو وستایل شوم،په ټوله کې سږکال دغلته درې لویې او مهمې پروژې وې چې د ښاروالۍ لخوا تطبیق شوې.»
دغه په کار بوخت ځوانان د نورو بې برخلیکه ځوانانو لپاره هم د داسې کاري فرصتونو پر ایجاد ټیګار لري.
یو تن په کار بوخت ځوان وايي:« خدایه شکر الحمدالله زه د ښاروالۍ له پاملرنې خوښ یم چې د کار زمینه یې راته برابره کړه.»
یو بل په کار بوخت ځوان بیا په دې اړه وايي:« که موږ ته د کار زمینه نه وای چمتو شوې شاید ایران یا کوم بل هېواد ته به مو په سختو مشکلاتو سفر کاوه.»
ورته مهال د خلم ولسوالۍ یو شمېر اوسېدونکي د ښار ودانولو کې د لا زیاتو ورته پروژو تطبیق غوښتونکي دي.
د خلم ولسوالۍ یو تن اوسېدونکی وايي:« زه تمه لرم چې له دې لا زیاته ابادي وشي څو ښار مو پرمختګ وکړي، هره پروژه چې تطبیق کېږي موږ خوښ او هرکلی یې کوو.»
د خلم ولسوالۍ اوسېدونکی وايي:« اوس مهال موږ د ښاروالۍ له کار کړنو خوښ یو. سړکونه مو جوړ شوي کومې پروژې چې ښاروالۍ تر لاس لاندې لرلې پلې شوې.»
خلم د سمنګان ولایت هغه لرغونې او باستاني ولسوالۍ ده چې د جهان نما بڼ، تاشقرغان تنګی او له ورته نورو تفریحي سیمو یې هر کال زرګونه کورني او بهرني سیلانیان لیدنه کوي.
