Skip to content
د افغانستان اسلامي امارت د ویاند مرستیال انعام الله سمنګای وايي، د سیمې له ډېری هېوادونو سره ډیپلوماتیکې اړیکې لري او سیاسی استازي یې تګ راتګ لري.
سمنګانی وايي،هڅې روانې دي،چې دغه ډیپلوماتیکې اړیکې پر رسمي هغو بدلې کړي.
هغه زیاته کړه:« د افغانستان دولت دیپلوماتیکې اړیکې تقریبا د سیمې له ټولو هېوادونو سره شتون لري. د ا.ا هڅه دا ده چې باید د هرې ورځې په تېرېدو سره تعامل غښتلی شي او موږ وکولی شو په ټولو برخو کې د سیمې او نړۍ له هېوادونو سره رسمي تعامل ولرو. »
د سیاسي چارو یو شمېر شنونکي بیا وايي،اوسنی افغان حکومت په خاموشه توګه پر رسمیت پیژندل شوی او اوس یوازې رسمي اعلان پاتې او دا کار د اسلامي امارت د مشرتابه انعطاف پورې تړلی دی.
د سیاسي چارو شنونکی عبدالستار سعادت وايي:« اوسنی حکومت د نړیوالو حقوقو له مخې ضمني مشروعیت لري. د ډېرو مقتدیرو هېوادونو سفارتونه او کونسلګرۍ دلته خلاصې دي او په زیاتو هېوادونو کې سفارتونه افغان لوري ته سپارل شوي. د دې مانا داده،چې د نړیوالو حقوقو له مخې مشروعیت شته،اما اعلامي مشروعیت نه دی ترسره شوی،خو په مشرتابه کې که ځینې انعطافونه وښودل شي،چې هغې ته هم فاصله کمه ده او ښايي ځینې هېوادونه خپله رسمیت پیژندنه اعلان کړي.»
دمګړۍ په کابل کې د چین، روسیې او ترکیې سربېره ۱۳ هېوادونه فعال سفارتونه لري او ډیپلوماتان یې د اسلامي امارت له چارواکو سره رسمې لیدنې هم لري.
دپاکستان،ایران او روسیې ترڅنګ د سیمې ګڼو نورو هېوادونو هم د افغانستان سفارتونه اوسني حکومت ته سپارلي دي.
