د اروزګان د ولایتي شورا منشي عبدالکریم خادم زی وايي، ګیزاب ولسوالۍ نن سهار په بشپړ ډول د طالبانو له لورې سقوط شوه.
هغه وايي، یاده ولسوالۍ کې د هغو لسګونو سرتېرو برخلیک نه دی مالوم، چې د طالبانو له لورې د یادې ولسوالۍ د ملي اردو په یوه کمپ کې محاصره وو.
هغه زیاتوي، چې د دغه ولایت دوه نورې ولسوالۍ “چوره او چنارتو” کې هم طالبانو پر حکومتي ځواکونو ډله ییز بریدونه پیل کړي او که مرسته ورته ونه رسېږي د دواړو ولسواليو د سقوط ګواښ زیات دی.
خو د اروزګان د والي مطبوعاتي دفتر وايي، ګیزاب ولسوالۍ ته تازه دمې ځواکونه رسېدلي او حکومتي ځواکونو یوازې له ځینو سيمو تاکتیکي شاته تګ کړی دی.
هاخوا د طالبانو ویاند قاري یوسف احمدي چې ګیزاب ولسوالۍ د دایکندي ولایت اړوند ګڼي وايي، یاده ولسوالۍ یې په بشپړ ډول نيولې او هلته بند پاتې سرتېري او ولسوال طالبانو ته تسليم شوي دي.
قاري یوسف احمدي زیاتوي، چې د اروزګان په چوره ولسوالۍ کې یې هم د ملي اردو پر یوه لوی مرکز موټربم برید کړی، یاد مرکز او ۱۵ نورې پوستې یې نيولي دي.
تر دې وړاندې د اروزګان د ولایتي شورا ځینو غړو اندېښنه ښودلې وه، که ګیزاب ولسوالي ته مرستندویه ځواکونه ونه رسېږي دغه ولسوالي به په بشپړ ډول سقوط شي.
