د هند په نوي ډهلي کې د افغانستان مقيم سفارت یوې سرچينې شمشاد ټلوېزیون ته په دې سفارت کې وروستي رامنځته شوي اختلافونه تائيد کړي دي.
سرچینه زیاتوي،چې په نوي ډهلي کې د افغانستان سفير فرید ماموندزی څو ورځې وړاندې بريتانيا ته د خپلې کورنۍ لیدنې په موخه په سفر تللی وه، چې د سرچينې په خبره د سفارت مطبوعاتي سلاکار قادرشاه بیا د ايمېل له لارې دا جریان د افغانستان بهرنيو چارو له وزارت شریک کړی و او د نوموړي سفر يې له سفارته تېښته ياده کړې وه.
د سرچينې د مالوماتو له مخې، د افغانستان بهرنیو چارو وزارت هم د قادرشاه د ایمېل په ځواب کې د چارو د نه ټکني کېدو په موخه، نوموړی د شارژدافېر په توګه ټاکلی وه، خو دا چې فريد ماموندزی د هند د بهرنيو چارو وزارت له لوري د سفارت له وضعيت خبرېږي، نوي ډهلي ته راځي او په سفارت کې د تېر په څېر خپل کار ته دوام ورکوي.
سرچینه زیاتوي:« ماموندزی د خپلو بچيانو د ليدنې لپاره لندن ته تللی وه او قادرشاه چې په سفارت کې مطبوعاتي سلاکار دی، کابل ته يې ايمېل کړی وه، چې ماموندزی له سفارته تښتېدلی دی. کابل کې د بهرنيو چارو وزارت څخه په ايمېل کې قادرشاه ته ويل شوي وو، چې د شارژدافېر په توګه د سفارت چاري سمبال کړي او نوموړي بيا دا ايمېل د هند د بهرنیو چارو وزارت ته وړی وه. کله چې د هند بهرنيو چارو وزارت له فريد ماموندزي سره اړیکه نيسي، نو هغه سملاسي له لندن نوي ډهلي ته راځي او سفارت کې خپل کار پيل کوي او له هغې تر اوسه قادرشاه سفارت پرېښی او بېرته نه دی راغلی.»
په ورته وخت کې په هند کې د افغانستان سفير فرید مامودزی هم د سرچینې دا جريان تائیدوي او شمشاد ته یې په لېږلي وېډيویي کليپ کې وايي، د افغانستان او هند تاريخي ډيپلوماټيکو اړیکو ته په پام سره به د هند حکومت د قادرشاه په اړه چې دا مهال په سفارت کې دنده نه لري، تصميم ونيسي.
ځينو رسنيو هم په قطر کې د اسلامي امارت د سياسي دفتر مشر سهيل شاهين له قوله ويلي، چې ګواکې د افغانستان سرپرست حکومت قادرشاه هند کې د سفارت د شاژردافېر په توګه ټاکلی دی.
بل خوا په هند کې د افغانستان سفارت په یوه تازه اعلامیه کې چې ظاهرا یې اشاره قادرشاه ته ده، د شارژدافېر په توګه د کوم چا ګومارل کېدل رد کړي دي.
د خبرپاڼې یوه برخه:« هغه کس چې د طالبانو له لوري د شارژدافېر په توګه د ټاکل کېدو ادعا يې کړې، د سفارت د مسوولانو پر وړاندې د ناسمو مالوماتو د خپرولو، د نه ملاحظې وړ کمپاين کولو او د هغو ادعاوو په اړه مسوول دی، چې له ځانه يې د فساد په اړه کړي.»
شمشاد د دې مسلې په اړه د اسلامي امارت له وياندويانو سره اړيکه وکړه،خو مالومات يې شريک نه کړل.
قادرشاه چې په دې مسئله کې د بې ځايه ادعا کولو او ناسمو مالوماتو په ورکولو تورن شوی، هڅه مو وکړه،چې نظر يې واخلو، خو زموږ اړيکې يې ځواب نه کړې.
