د المرصاد په نوم يوې رسنۍ د خپلو سرچینو په حواله خبر ورکړی چې سېشنبه (د فبرورۍ درېیمه) د خیبرپښتونخوا په باړې سیمه کې نامعلومو وسلهوالو د داعش پر پټنځای برید ترسره کړی.
دې رسنۍ د خپلو سرچينو په حواله د پېښې کره ځای د باړې اړوند د قمبرخېلو شنکي سیمه ياده کړې او وايي، بريد د شپې پر مهال شوی او د يادې ډلې ۱۱ غړیو پر وژلو سربېره یې درې نور ژوبل کړي هم دي.
د المرصاد د راپور له مخې، د وژل شویو کسانو له ډلې زيات شمېر يې بهرني وګړي دي او له هغه وروسته په دې سیمه کې مېشت شوي وو چې د تېر کال په نومبر کې په جبار مېله سیمه کې پرې د بېپيلوټه الوتکو له خوا بريدونه وشول.
المرصاد رسنۍ زیاته کړې: « المرصاد ته سرچينو ويلي چې نامعلومو وسلهوالو پېښور ته نږدې د باړې، قمبرخېلو په شنکي سيمه کې د داعش خراسان څانګې پر پټنځايونو بريد کړی. د سرچينې په خبره، په دې بريد کې ډېری هغه بهرني اتباع وژل شوي چې په جبار مېله کې پرې د بې پيلوټه الوتکو له بريدونو وروسته بې ځايه شوي وو.»
المرصاد ته سرچينو دا هم منلې چې د بلوچستان په مستونګ کې د داعش يوه مهم مرکز له پاشل کېدو وروسته دې ډلې په خیبرپښتونخوا کې پر مېشتېدنې تمرکز زيات کړی او غواړي له دې سيمې خپل فعالیتونه بېرته منسجم کړي.
له دې سره هممهاله، ټاکل شوې د ملګرو ملتونو امنيت شورا د داعش له ادرسه نړيوالو ګواښونو او د دې ډلې له خوا د رامنځته شويو ناامنيو په اړه ناسته وکړي.
که څه هم ملګرو ملتونو له ډيورنډ فرضي کرښې پورې غاړه د يادې ډلې د پټنځايونو يادونه کړې، خو شنونکي ترې غواړي چې په يادو سيمو کې د داعش موجوديت په اړه پر شته اسناد تمرکز زيات کړي.
د سياسي چارو شنونکی روح الله هوتک وايي: « امنیت شورا د ۱۵ غړیو هېوادونو له خوا اداره کېږي چې اکثریت یې د لوېدیځ له نفوذ څخه برخمن دي او هلته د افغانستان په اړه له آوازو څخه ګټه اخلي. امریکا او نور لوېدیځ هېوادونه د افغانستان په اسلامي امارت فشار راوړي او د دوحې تړون له موادو سره سم یې د ترهګرۍ ضد مبارزې ته هڅوي.»
د سياسي چارو شنونکی توريالی ځاځی وايي: « پاکستان په سیمه کې د اسلام دین او مسلمانانو د نوم بدولو لپاره جوړ شوی. موږ په تېرو څو لسیزو کې ولیدل چې پاکستان له هېڅ ډول ناروا بشري جنایتونو درېغ ونه کړ.»
له دې وړاندې هم اسلامي امارت ويلي و چې په افغانستان کې له ځپل کېدو وروسته، داعش ډلې په بلوچستان او د پاکستان تر کنټرول لاندې خيبر پښتونخوا کې پټنځايونه جوړ کړي دي.
د حکومتي چارواکو د معلوماتو له مخې، د يادې ډلې مهم غړي لا هم په يادو پټنځايونو کې موجود دي او هلته منظمه همکاري ترلاسه کوي.
