د سرپل له غرونو راټوکېدلي سیندونه چې ډېری یې د بامیان بند امیر چینو څخه سرچینه اخلي، هر کال د پسرلنیو سېلابونو په مستو څپو د سیندونو پر غاړه مېشتو کورنیو ته د سر او مال درانه زیانونه اړوي.
د همدې څپانده سیندونو له بهیر څخه یوازې څو کیلومتره لرې، سلګونه کورنۍ د وچکالۍ له تندې او د اوبو له کمښت سره لاس او ګرېوان دي چې د اوبو اغېزناک مدیریت ته لا ډېره اړتیا په ډاګه کوي.
د سرپل ولایت د سیندیزې حوزې مسوولین وایي، د اوبو مدیریت او د برېښنا تولید په موخه یې د اتو بندونو د سروې او ډیزاین چارې پیل کړې دي.
د سرپل سیندیزې حوزې رییس قاري بهرام الدین عمري وايي: « د اتو بندونو سروې شوې او ډیزاین یې په عملي توګه پيل شوی. د دغو له ډلې د دوو بندونو ډیزاین هم بشپړ شوی چې یو په کې د اختیار درې بند او بل هم د سنچارک بند دی. همدارنګه نږدې راتلونکي کې به د سلطان ابراهیم بند ډیزاین هم بشپړ شي.»
د سرپل ځایي مسوولین وایي، د کورنۍ برېښنا د تولید ترڅنګ د یاد ولایت اوسېدونکو لپاره د وارداتي برېښنا د پراختیا په موخه هم درې پروژې منظورې شوې چې ټاکل شوې ده عملي چارې یې په نږدې راتلونکي کې پیل شي.
د مسوولینو په وینا، په دغو پروژو کې له سرپل ښار څخه د سوزمهقلعې، ګوسفندي او سانچارک ولسوالیو ته د برېښنا شبکې غځول شامل دي چې په پلي کېدو سره به یې د دغو سیمو ګڼ اوسېدونکي له برېښنا برخمن شي.
بهرام الدین عمري په دې اړه وايي: « سوزمه قعله، سنچارک او ګوسفندي ولسوالیو کې د بندونو جوړول د جمهوریت پرمهال سروې شوې وه، اوس یې د جوړېدلو منظور راغلې او قرارداد ته سپارل شوي، خو عملي کار یې نه دی پيل شوی. له دې سره به یادو درېیو ولسوالیو ته برېښنا وغځول شي.»
بله خوا، د سرپل ولایت اوسېدونکي او اقتصادي کارپوهان د اوبو مدیریت د اقتصادي ودې، کرنیز پرمختګ او ټولنیزو ستونزو د هواري لپاره مهم بولي او د یادو پروژو هرکلی کوي.
د دوی په خبره، د کورنۍ برېښنا د تولید زیاتوالی او د اوبو اغېزناک مدیریت په مستقیم ډول د خلکو پر ژوند مثبت اغېز کوي.
د سرپل اوسېدونکی حیات الله اسحاقزی وايي: « د دې بندونو له اوبو څخه به د اوړي په فصل کې ګټه اخلو. موږ له حکومت غوښتنه کوو چې د سروې او ډیزاین شویو بندونو کارونه ژر تر ژره پیل او ګټه اخستنې ته چمتو کړي.»
اقتصادي کارپوه عبدالظهور مدبر وايي: « افغانستان د نوې کېدونکې انرژۍ له پلوه بډایه هېواد دی. هرڅومره چې موږ په دې سکټور کې فعالیت ولرو او په ځانګړې توګه برېښنا تولید کړو، کولی شي د هېواد په اقتصاد کې رغنده رول ولري.»
سرپل ولایت چې لس ولسوالۍ لري، تر اوسه یې هېڅ یوه له برېښنا څخه برخمنه نه ده مګر تمه کېږي چې د منظورو شویو پروژو په پلي کېدو سره به د دې ولایت یو شمېر ولسوالۍ د لومړي ځل لپاره د برېښنا له اسانتیاوو برخمنې شي.
