د سرپرست حکومت د تازه پریکړې له مخې، د ودونو او غونډو پرمهال به په تالارونو کې له دې وروسته د واردو شویو مېوو پر ځای، له وطني مېوو څخه ګټه اخیستل کیږي.
چارواکي وايي، دا پرېکړه د اقتصادي پیاوړتیا او د کورنيو محصولاتو او بزګرانو د ملاتړ په موخه شوې ده.
د کابل ښاروالۍ مسوولین وايي، د ودونو هوټلونو، د غونډو تالارونو ته يې خبر ورکړی چې له دې وروسته به د بهرنیو مېوو پر ځای له وطنې مېوو ګټه اخلي.
د ښاروالۍ استازی نعمت الله بارکزی خبرداری ورکوي، چې له پرېکړې سرغړوونکو سره به قانوني چلن کېږي.
بارکزی زیاتوي:« د حکومت له پرېکړې سره سم، ټول هوټلونه مکلف دي چې له داخلي مېوو څخه ګټه واخلي، ترڅو له یوې خوا زموږ د کروندګرو بازار ګرم شي او له بلې خوا خلک د خپلو وطني محصولاتو کارونې ته وهڅوو. »
د تازه مېوو یو تن سوداګر وايي: « موږ یو ځل نه تر لسو ځلونو زیات وړاندیز کړی چې باید د ودونو تالارونه، دولتي ادارې او وزارتخانې له وطني مېوو ګټه واخلي. دا یو ښه ګام دی او موږ یې هرکلی کوو.»
د تازه مېوو بزګر هم له دې ګام خوښ دی او وايي: «که له وطني مېوې څخه ګټه واخیستل شي، دا زموږ د بزګرانو لپاره ښه زېری دی، ځکه د کروندګرو وضعیت به ورسره ښه شي. په هېواد د ننه باید هر ځای کې له وطني مېوو څخه ګټه واخیستل شي.»
بله خوا، د ودونو د هوټلونو مالکان که څه هم د سرپرست حکومت له دې پریکړي خوښ دي خو وايي، د وطني مېوو د شتون پرمهال ترې ګټه اخلي، خو د مېوو له موسم وروسته اړ دي چې له بهرنیو مېوو ګټه واخلي.
دوی وايي، سرپرست حکومت دې وطنې مېوو ته سړي خونې جوړې کړي تر څو دوی وکولی شي هر وخت يې تر لاسه کړي.
په کابل کې د ودونو د یوه هوټل مالک محمد وصال قيومي وايي:« دا کار یوازې په هوټلونو نه کېږي، باید دولتي ادارې او دغه راز د افغانستان خلک هم له وطني مېوو ګټه واخلي، ترڅو زموږ اقتصاد وده وکړي.»
سوداګر وايي، د سرپرست حکومت دغه پرېکړه له کروندګرو سره لویه مرسته کوي او لامل کېږي چې نور هم خپلو کارونو ته وهڅېږي.
دوی زیاتوي، د دې ترڅنګ اړتیا ده چې سرپرست حکومت له ګاونډیو هېوادونو سره د لویو لارو په خلاصون کې هڅې وکړي، ترڅو وطني حاصلات په اسانۍ سره کاونډیو هېوادونو ته ورسېږي.
