Nor Ul Jihad Herat
هرات اوسېدونکي: هیله لرو د نورالجهاد سبسټېشن په فعالېدو سره د برېښنا ستونزه هواره شي
هرات یو له سترو صنعتي ولایتونو دی او صنعت برېښنا ته اړتیا لري، خو د دې ولایت اوسېدونکي هم د هېواد د نورو سیمو په څېر په ساړه او تاوده موسم کې د برېښنا کمښت له امله ستونزو سره مخ وي. څو ورځې وړاندې د ټاپي پروژې له پیل سره سم په دې ولایت کې د نورالجهاد برېښنا سبسټېشن په فعالیت پيل وکړ او د ظرفیت په لوړېدو سره یې تمه ده چې د ترکمنستان وارداتي برېښنا هم دوه برابره شي. د دې ولایت اوسېدونکي اوس د برېښنا کمښت ستونزې هوارېدو ته هیله من شوي دي.
د هرات اوسېدونکی احمد شفیع وايي: « په دې وروستیو کې د هرات ښار کې د برېښنا پرچاوي زیاته شوې وه. اوس چې نور الجهاد سبسټېشن فعال شوی، د برېښنا په تړاو د خلکو ډېرې ستونزې به هوارې کړي او په کاروبار کې به اسانتیاوې راشي.»
د هرات ښار یو تن بل اوسېدونکی وايي: «موږ کولی شو د برېښنا له پلوه پرمختللیو امکاناتو ته لاسرسی پیدا کړو. همدا اوس په صنعتي ښارګوټي کې ډېرې فابریکې برېښنا ته اړتیا لري.»
بله خوا، د هرات صنعت او سوداګرۍ ریاست مسوولین هم ډاډ ورکوي چې د نورالجهاد سبسټېشن ظرفیت په لوړېدو سره به د دې ولایت صنعتي ښارګوټي کې د برېښنا کمښت ستونزه څه نا څه حل او د کورنیو تولیداتو وده به چټکه شي.
د هرات د صنعت او سوداګرۍ رییس بشیر محمد سیرت وايي: « د ګازو او برېښنا پروژې په صنعتي برخو کې ډېر زیات رول لري او د کارونو د پرمختګ سبب کېږي.»
همدارنګه، د افغانستان برېښنا ریاست مسوولین هم د پرمختګونو خبره کوي او وایي، هرات کې د نورالجهاد سبسټېشن ظرفیت د برېښنا شرکت د ۳.۵ میلیون ډالرو په لګښت، دوه برابره لوړ شوی او اوسمهال یې ظرفیت د ۱۱۰ کیلو وولټ څخه ۲۲۰ کیلوولت ته پورته شوی دی.
د برېښنا ریاست اجرائیوي رییس عبدالباري عمر وايي: «د دغه سبسټېشن په ظرفیت لوړېدو سره به د هغې ۶۰ تر ۷۰ مېګاواټه وارداتي برېښنا کچه تر ۱۲۰ مېګاواټو لوړه شي چې له ترکمنستان څخه راځي. په دې سره به د هرات د خلکو او صنعتي پارکونو ستونزې تر ډېره هوارې شي.»
د نورالجهاد سبسټېشن د ټاپ پروژې یوه برخه ده چې په راتلونکو کالو کې به فراه، نیمروز، کندهار، زابل او ارزګان ولایتونه هم د دې پروې له برېښنا څخه برخمن شي.
