د افغاني سرې میاشتې ټولنې مسوولینو په هېواد کې د یوه کال خدمتونو راپور کندهار د مطبوعاتي کنفرانس پر مهال شریک کړ.
د دې ادارې مسوولینو وویل، تېر کال یې په ټول هېواد له ۳۳۵ زره زیاتو راستنو شویو هېوادوالو ته مرستې رسولې دي، د طبیعي پېښو له ۵۱۱ زره زیاتو زیانمنو لاسنیوی يې کړی او نږدې ۳ میلیونه ۸۰۰ زره کسانو ته يې د روغتیایي خدمتونو او درملنې اسانتیاوې برابرې کړې دي.
د دوی په خبره، د تېر کال په پرتله د امنیت له امله خدماتو کچه ۳۰ سلنه زیاته شوې.
د افغانستان سرې میاشتې مطبوعاتي دفتر غړی وحیدالله حیدري وايي: « زموږ خدمتونه او فعالیتونه د تېر کال په پرتله تقریبا ً ۳۰ سلنه زیات شوي. ځینې وجوهات یې دا دي چې د ټول هېواد په کچه امنیت ښه شوی او هغه ټولې اسانتیاوې برابرې دي چې زموږ ورته اړتیا ده. همدارنګه لرې پرتو سیمو ته زموږ روغتیايي، مرستندویه او ژغورندویه ټیمونه رسیدګي کولی شي.»
سره له دې چې سره میاشت خپل خدمتونه تر نورو کالونو ښه او ډېر ښيي، خو په ورته مهال له نړیوالو بنسټونو او سوداګرو هم غوښتنه کوي چې له دوی سره مالي ملاتړ او همکاري ډېره کړي.
وحیدالله حیدري په دې اړه وايي: « زموږ د خدمتونو مهم اهداف دا دي چې ولس ته خدمات ورسوو، د پېښو پرمهال خپل خلک وژغورو، کډوالو او راستنېدونکو ته امکانات برابر کړو. همدارنګه هغو لرو پرتو سیمو کې چې هلته کلینیکونه نه وي یا مرستې نه ورسېږي، په دې سیمو کې بېوزله کورنۍ په نښه او مرستې ورسره وکړي.»
د کندهار سرې میاشتې مطبوعاتي مسوول مفتي محمد شعیب حقاني وايي: « موږ د روغتیايي خدماتو وړاندې کولو لپاره ثابت کلینیکونه لرو چې په ښارونو کې فعالیت لري، بل زموږ ګرځند کلینیکونه دي چې تر اوسه په محدودو ولسوالیو کې فعالیت لري؛ د مثال په توګه په معرف ولسوالۍ، دامان او بولدک ولسوالیو کې شته دي. د امکاناتو په برابرېدو سره به نورو ولسوالیو ته هم دا خدمتونه وغځوو.»
بله خوا، د کندهار یو شمېر اوسېدونکي چې د سرې میاشتې له خدمتونو برخمن دي، د دغو خدمتونو پر دوام او ورته مهال نورو سیمو ته د غځېدو غوښتنه کوي.
د کندهار اوسېدونکی نقیب احمد وايي: « که د نورو نړیوالو بنسټونو مرستې نه وي، دوی په یوازې ځان نه شي کولی ټولو خلکو ته ورسېږي.»
د کندهار اوسېدونکی عبدالسمېع وايي: « زه له خلکو غوښتنه کوم چې له مرستون سره مرستې وکړي، ترڅو یې هغوی د خلکو او یتیمانو لپاره ولګوي.
د کندهار اوسېدونکی عطا الله وايي: « زه یتیم یم او زما په څېر دلته نور یتیمان او بېوزلان هم شته دي. زما غوښتنه دا ده چې موسسې او خانان له دې مرستون سره مرسته وکړي، ترڅو د یتیمانو پالنه وشي.»
د افغاني سرې میاشتې ټولنه په داسې حال کې د خپلو خدمتونو د زیاتوالي خبر ورکوي چې د خلکو په خبره، د ولسوالیو او لرې پرتو سیمو اوسېدونکي لا هم له ډېرو ستونزو سره مخ دي او د دې ادارې د لا ډېرو او پراخو خدمتونو غوښتونه کوي.
