Skip to content
د سره صلیب کمیټه وايي،عمومي مشر رابرټ مارډیني د فبرورۍ پر ۲۱ نیټه له لوړپوړي پلاوي سره کابل ته راغلی او دلته یې له روغتیايي مرکزونو نږدې لیدنه کړې،چې د راتلونکو همکاریو په موخه پراخه ارزونه وکړي.
د سره صلیب ادارې په یوه خبرپاڼه کې د هغه د راتګ خبره کړې او په افغان روغتیايي سیسټم کې یې اوسنیو ستونزو ته هم د خلکو پام ور اړولی دی
د سره صلیب ادارې د خبرپاڼې یوه برخه:«د بانکوالۍ او د نغدو پیسو ناورین مستقیمې او سترې اغیزې پر روغتیایي سیسټم لري. روغتیایي مرکزونه د دې توان نه لري،چې معاشونه ورکړي یا د سون توکي چمتو کړي،
امبولانسونه فعالیت نه شي کولای، ناروغان خواړه نه لري او کافي دارو درمل هم نه لري.»
سره صلیب تر دې دمه د ۲۸ حوزوي،ولایتي او تدریسي روغتونونو د کارکوونکو معاشونه ورکړي دي او وايي،دا مرسته او همکاري یې د دې لپاره کړي،چې په افغانستان کې روغتیايي سیسټم سقوط ونه کړي.
سره صلیب ادارې خبرپاڼې یوه برخه:« سره صلیب د روغتونونو د ملاتړ پروژې له لارې بېړنۍ چارې سرته رسولي،ترڅو ډاډ ترلاسه کړي،چې روغتیایي سیسټم سقوط ونه کړي، په دې توګه د ۲۸ حوزوي،ولایتي او تدریسي
روغتونونو د کارکونکو معاشونه یې ورکړي،چې په ټولییزه توګه ۵۷۲۵ بسترونه لري.»
بل لور ته د اقتصادي چارو شنوونکي بیا وايي،ښايي نورې مرستې د بېلابېلو چینلونو له لارې مصرف شي،خو د سره صلیب مرستې د دې لپاره اغیزمنې دي،چې په مستقیم ډول تر اړمنو کورنیو رسیږي.
د اقتصادي چارو شنونکی نورالله عزیز عزیز واييي:«د دوی ټولې مرستې بشردوستانه دي او د دوی د مرستو لړۍ تر ډېره مثبتې اغیزې لري،ځکه دوی هغه کورنۍ په نښه کوي،چې مرستو ته اساسي ضرورت لري.»
ویل کیږي،چې له مارډیني سره په دې سفر کې د فنلنډ د سره صلیب د سکرتر جنرال کریسټینا کامپولا او د ډنمارک د سره صلیب سکرتر جنرال انډریس لاډیکارل هم ملګري وو،چې پرون یې دغه پنځه ورځنی سفر پای ته ورسید.
