د کورنيو چارو وزارت سرپرست سراجالدين حقاني د افغانستان سرپرست حکومت او نړيوالو ترمنځ ډيالوګ د تفاهم عمده لار بولي او وايي، نړيوال دې د افغانستان له حکومت سره ټول مسايل له همدې لارې تعقيب کړي.
نوموړي دا څرګندونې د جاپان سسکاوا سولې بنسټ له پلاوي سره د کتنې پرمهال کړي او ټينګار يې کړی، چې د خبرو اترو له لارې د ستونزو حل معقول او ممکن دی.
د حقاني په خبره، هېوادونه دې له عامو افغانانو سره خپلې بشري مرستې له سياسي ملحوزاتو سره نه تړي.
هغه زیاته کړه:« د بهرنیانو لخوا رامنځته شوي محدویتونه د بشري اړتیاوو د تراژیدۍ لامل ګرځي. حال دا چې د افغانانو اساسي بشري اړتیاوې باید له سیاسي مسایلو په جلا توګه وارزول شي.»
د سیاسي چارو کارپوهان هم بشري مرستې او زدهکړې سياست جلا بولي او د سرپرست حکومت د دريځ په پلوه له هېوادونو غواړي چې له افغانستان سره د بشري مرستو دوام د سياسي مسايلو ښکار نه کړي.
د سياسي چارو کارپوه معين ګل څمکنی وايي: « نړۍ دې بشري مرستې د سیاست تر اغېزو لاندې نه راوړي، ځکه په نړۍ کې څو معیارونه دي، لکه: سپورټ، سوداګري، بشري مرستې، پوهنه او داسې نور، چې دا باید د سیاست قرباني نه شي؛ نو هېله ده چې نړیوال دې ته ځانګړې پاملرنه وکړي لکه څنګه چې جاپان دې نقطې ته متوجې شوی دی، هېله ده چې نور هېوادونه هم متوجې شي او له موږ سره په دې اساسو شېبو کې خپلو مرستو ته دوام ورکړي.»
خو ځيني نور بيا له سرپرست حکومت هم په يو لړ پالیسيو کې د نرمښت غوښتنه کوي او په خبره، یې د همدې پالیسيو له امله حکومت نه دی توانېدلی چې د رسميت پېژندنې په موخه ملي تفاهم رامنځته کړي.
د سياسي چارو کارپوه زمان ستانکزی وايي: « دوی دې ولسي جرګه، لویه جرګه یا دې په کومه بله بڼه یوه جرګه جوړه کړي، څو له دې لارې طالبان هم خپل مشروعیت حاصل کړي او افغان ملت هم خپلو غوښتنو ته ورسېږي، چې په افغانستان کې د قانون حاکمیت رامنځته شي. دغه اوسني شرایط چې په دې کې امنیت شته، سوله نشته؛ نو دا هر څه باید په سوله بدل شي.»
له دې وړاندې د افغانستان لپاره د روسیې ځانګړي استازي ضمیر کابلوف هم کابل ته د سفر په لړ کې له حکومتي چارواکو سره د لېدنو پرمهال ويلي ول چې هېوادونه باید له سرپرست حکومت سره ستونزې د خبرو او تعامل له لارې حل کړي.
