د بهرنیو چارو وزارت سیاسي معین شیرمحمد عباس ستانکزی یو د هغو کسانو له ډلې دی،چې تل د نجونو زده کړو پلوی دی او په خپلې هرې وینا کې د نجونو پر وړاندې د ښوونځیو او پوهنتونونو د دروازو پرانېستلو ټېنګار کوي او له شریعي پلوه یې مسلم حق ګڼي.
ستانکزي په دوبي کې د افغانستان له کونسلګرۍ د لیدنې پرمهال یو ځل بیا ټېنګار کړی،چې باید په هېچا د زده کړو دروازې بندې نه شي او علم دیني او دنیوي نه لري،ټول یو علم دی او پرنارینه او ښځينه فرض دی.
ستانکزی وايي، دنیوي علم د دین د تقویې او لا قوت لپاره دی او زده کړه یې مهمه او فرض ده.
هغه زیاته کړه:« زه او زما ملګري په دې نظر باندې دي،چې د علم دروازې باید په چا بندې نه شي،هغه نر دی که ښځه، علم ورباندې فرض دی.که دنیوي او که دیني علم دی اولآ خو ټول علم یو علم دی،ځکه د دین د تقوې لپاره دغه شیان دي،کوشش کو چې دغه مشکل سره حل کړو،چې د زده کړو دروازې د خویندو او وروڼو پرمخ باندې جوړې او برابرې شي.»
ستانکزی وايي،نجونو ته د زده کړو زمینې برابرو لپاره له مشرانو سره یې ناستې کړي،دلایل یې وړاندې کړي او همدار از هڅه کوي،چې دغه ستونزه حل شي.
دغه را زستانکزی وايي، د هېواد ۹۸ سلنه دیني علماء په دې نظر دي،چې باید د ښځو پر وړاندې د زده کړو دروازې خلاصې شي.
هغه زیاته کړې:« موږ له مشرانو سره دلایل ویلی دي، ورسره ناست یو او ۹۸ سلنه علما په دې نظر دي،چې باید د ښځو زده کړه هم ازاده شي، البته حکومت کې به یو تعداد خلک ځينې ملاحظې شرایط لري،موږ خو ورسره جنګ او جګړه نه شو کولی،کوشش کوو چې دا ستونزه حل شي.»
په همدې حال کې د افغانستان لپاره د امریکا ځانګړي استازي توماس ویست خپلو تازه څرګندونو کې د ښځو زده کړو مرکزنو پرانېسته د بشري حقونو مهمه موضوع یاده کړې،چې په وینا یې د افغانستان ثبات لپاره مهمه ده.
ویست ټېنګار کړی دی،چې باید په افغانستان کې د نجونو پر وړاندې د زده کړو دروازې خلاصې شي.
هغه زیاته کړې:« امریکا د دې لپاره د نجونو د زده کړو لپاره د دروازو پر پرانېستلو ټينګار کوي،چې دا د بشري حقونو یوه موضوع ده او په د اسې یوه هېواد کې د ټينکاو لپاره بنسټیزه موضوع هم ده .»
له هغې وروسته چې پر افغانستان اسلامي امارت واکمن شو، د نجونو پر وړاندې یې د ښوونځيو دروازې وتړلې او شااوخوا یو نیم کال کیږي،چې د نجونو ښوونځي بند دي او همدا راز پوهنتونونه یې هم د ښځو پروړاندې بند کړل،خو د اسلامي امارت خبره داده،چې د شریعت په چوکاټ کې د نجونو زده کړو مخالف نه دي او ځنډ یې هم لنډمهاله دی.
