د بهرنیو چارو وزارت سیاسي معین شېرمحمد عباس ستانکزی شمشاد سره په ځانګړو خبرو کې وايي، داسې شواهد ورسره دي چې څرګندوي داعش په پاکستان کې مرکزونه لري او د دې هېواد د پوځ له لوري روزنه ورکول کېږي، تجهیز او سمبالېږي او بیا یې افغانستان ته د بریدونو لپاره راستوي.
د بهرنیو چارو وزارت سیاسي معین شېرمحمد عباس ستانکزی زیاتوي:« موږ د دې ثبوت لرو او دا مو څو څو وارې ویلي دي. موږ سره اوس هم داعشیان شته او د هغوی له اقرار او ویډیوګانو ښکاري چې زموږ په ګاونډ کې، متأسفانه باید ووایم چې پاکستان کې مرکزونه لري، هلته روزنه ورکول کېږي، د پاکستان پوځیان دوی ته روزنه او وسلې ورکوي او بیا یې افغانستان ته رالېږي. خو موږ تصفیه کړي او له منځه مو وړي دي.»
د پوځي چارو شنونکی حکمتالله حکمت وايي: « پاکستان په لر او بر افغان خاوره کې د جګړې، تاوتریخوالي او کړکېچ رامنځته کولو عمیقه ستراتیژي لري. په دې خاوره کې جګړه کول د پاکستان د نورو ستونزو د حل لپاره د پاکستاني پوځیانو په فکر د حل لاره ده. باید په ډېر دقت او سیاسي شعور سره د دې جګړې پر وړاندې تدابیر ونیول شي.»
د بهرنیو چارو وزارت سیاسي معین دغه راز وايي، د استخباراتي معلوماتو له مخې، د پاکستان بې پیلوټه یا ډرون الوتکې وخت ناوخت د افغانستان حريم ته ننوځي او د دې ترڅنګ یې امریکا ته هم له خپلې خاورې د ورته کار لپاره د استفادې اجازه ورکړې.
شېر محمد عباس ستانکزی وايي: « ډرون چې راپور ته کېږي، زموږ معلومات ښيي چې ټول له پاکستان څخه راځي او د پاکستان له لارې راپورته کېږي. پاکستان خپل هوايي ډګرونه د امریکایانو په خدمت کې ورکړي او په مقابل کې له امریکا پیسې اخلي. په دې کې نه یوازې د امریکا ډرون راځي بلکې زموږ استخباراتي معلومات ښيي چې د پاکستان ډرون هم دلته راځي او د افغانستان پر حریم تېری کوي.»
د بهرنيو چارو وزارت دغه جګ پوړی چارواکی زیاتوي، سرپرست حکومت له امریکا سره د اړیکو ټینګښت ته لیواله دی او تمه لري چې د ډونالډ ټرمپ حکومت په راتګ سره به پر افغانستان لګیدلي بندیزونه لرې شي.
د بهرنیو چارو وزارت سیاسي معین په دې اړه وايي: « له ټرمپ څخه زموږ تمه دا ده چې د بایډن پالیسۍ له منځه یوسي، مثبت قدم واخلي او رامخته شي. د افغانستان اسلامي امارت دېته لېواله دی چې له دوی سره دوستانه اړیکې ولري. موږ کوم مشکل نه ورسره لرو او امید کوو چې د ټرمپ په نوې دوره کې بندیزونه لرې شي او د رسمیت خبره عملي شي، افغانستان او امریکا د دوستۍ اړیکې ولري.»
د اسلامي امارت د سرپرست حکومت د چارواکو په خبره، د دوحې تړون پر بنسټ د امریکا متحده ایالتونو حکومت مکلف و چې د افغانستان اوسنی نظام په رسمیت وپېژني او همدا راز په کابل کې خپل سفارت فعال وساتي، خو د دوی په خبره، د یاد تړون دغه بندونه لاهم نه دي عملي شوي.
