د بهرنیو چارو وزارت سیاسي معين شېرمحمد عباس ستانکزي د تخنيکي او مسلکي زده کړو ادارې له لوري د يوه نندارتون پرانيستلو پرمهال د سرپرست حکومت پر تېر دريځ يو وار بيا ټينګارکړی او وايي، په افغانستان کې د ثبات تحکيم د سيمې او ګاونډ پر ګټه دی.
ستانکزي دې هدف ته د رسېدو لپاره د افغانستان په ثبات کې د سيمې او ګاونډیو هېوادونو مثبت رول مهم بللی او زياتوي، ياد هېوادونه دې د خپلو سالمو ګټو د تعقيب لپاره په افغانستان کې د ثبات له دايمي کولو سره مرسته وکړي.
هغه په دې اړه وايي:« له ګاونډیو هېوادونو هم دا خواهش دی چې دوی کوشش وکړي له کوم حالت چې اوس افغانستان تېرېږي، په دې کې مثبت کردار اداء کړي او مثبت رول ولوبوي؛ ځکه یو پایداره، با استقامته او پر خپلو پښو ولاړ افغانستان او داسې افغانستان چې په کې سوله وي، هم د دوی په خیر دی او هم زموږ.»
دغه راز ستانکزی وايي، اوس د دې وخت را رسېدلی چې د بې عدالتيو پر وړاندې واحد دريځ او د مخنيوي لپاره يې يووالی غوره شي.
ستانکزي د تېر په څېر يو ځل بيا تعليم او تحصيل د افغانستان د پرمختګ او اقتصادي ودې لپاره حياتي بللی او زياتوي چې له دې لارې افغانستان په نړۍ کې د سالم رقابت جوګه کېدای شي.
هغه زیاته کړې: « د یوه هېواد د ترقي، تعالي، له دوښمن سره د مقابلې، له لوږې او جهالت سره د مبارزې او دغه راز د نړۍ له شومو دسیسو سره د مقابلې لپاره تر ټولو مهمه خبره دا ده چې هر هېواد خپل تعلیم، تربیې او علم ته وده ورکړي. بې له علمه او بې له پوهې، بې له تعلیم او تربیې هېڅ یو هېواد مخته نه شي تللی.»
د سیاسي چارو کارپوهان د ثبات ټينګښت او زده کړو په برخه کې د ستانکزي څرګندونې ګټورې بولي او زياتوي، که سرپرست حکومت د ځېنو چارواکو او خلکو دا غوښتنې ومني، پراخ ولسي ملاتړ او همکاري به جلب کړي.
دوی وايي، سرپرست حکومت باید د هېواد د آبادولو لپاره د رسمیت پېژندنې پر وړاندې شته خنډونه لري کړي او نړیوال دې تعامل ته وهڅوي.
د سیاسي چارو کارپوه اختر محمد راسخ وايي: « اوس هم وخت لا تېر نه دی، که څوک په هر ډول شرایطو کې تعلیم وکړي، د جامعې د هېواد او ادارې لپاره مفید تمامېدای شي. که چېرې د افغانستان په جغرافیا کې امن وي، سعادت او خوشبختي وي، دلته پرمختګ وي او ښه اقتصادي پلانونه پلي شي، له ګاونډیو هېوادونو سره د اقتصاد له آدرسه ښه راکړه ورکړه وشي، د افغانستان خاوره او اقتصادي بازار له ګاونډیانو سره په یوه ښه بازار بدل شي، یوازې د افغانانو لپاره نه بلکې د سیمې لپاره هم ګټه لري.»
د بهرنیو چارو وزارت سیاسي معین دغه راز ټينګار کړی چې د سرپرست حکومت اوسنۍ هڅې بسنه نه کوي او اړتیا ده چې په هره برخه کې هڅې لا زیاتي شي.
