د بهرنیو چارو وزارت سیاسي معین د سیمې او یو شمېر ګاونډیو هېوادونو هغه ادعاوې رد کړې چې وايي، افغانستان کې ترهګرې ډلې فعالیت کوي.
شېرمحمد عباس ستانکزي په کابل کې د یوه نندارتون پرانستغونډې ته د وینا پرمهال زیاته کړه، هېچاته اجازه نه ورکول کېږي چې د افغانستان امنیت ګډوډ کړي او په خبره یې د تېر پرتله په افغانستان کې هر ډول ترهګرې ډلې له منځه وړل شوې دي.
هغه په دې اړه وايي:« موږ هېچاته د فعالیت اجازه نه ورکوو. په تېرو درېیو کالو کې هغه ترهګرې ډلې له منځه یوړل شوې چې د امریکايي ځواکونو په شتون کې یې فعالیت درلود. څه موده وړاندې یوه ډله ونیول شوه چې مرکزونه یې له افغانستان څخه د باندې وو. هېچاته اجازه نه ورکوو چې د افغانستان خاوره د نورو په ضد وکاروي. بالمثل تعامل غواړو او اجازه نه ورکوو چې څوک زموږ په کورنیو چارو کې لاسوهنه وکړي.»
په ورته مهال، ستانکزی دوو ګاونډیو هېوادونو ایران او پاکستان ته په اشارې سره وایي، په دغو هېوادونو کې د افغان کډوالو پر وړاندې روان ناسم چلن د نړيوالو قوانینو خلاف او له زغم وتلی عمل دی.
هغه زیاته کړه:« په ایران او پاکستان کې زموږ یو شمېر کډوال او مهاجران له ناوړه سلوک سره مخامخ دي. موږ هیله لرو ګاونډیان دغو کډوالو سره ښه چلن او حوصله وکړي، ترڅو خپل هېواد ته یې د بېرته راتګ زمینه برابره شي. په ګاونډیو هېوادونو کې له مهاجرینو سره روان تشدد سیاسي بڼه لري او د زغم وړ نه دی.»
د سیاسي چارو يو شمېر شنونکي د افغانستان په اړه د ځينو هېوادونو دريځ ثابت نه بولي او وايي، دغه هېوادونه خپلو ګټو ته په کتو له حالاتو سره سم د دريځ په بدلولو سره پر سرپرست حکومت تورونه پورې کوي.
د سیاسي چارو شنونکی توريالی ځاځی وايي: « د نړۍ او ګاونډ یو شمېر هېوادونه او په ځانګړې توګه پاکستان په خپل سیاست کې ثبات نه لري. دوی د خپلو سیاسي موخو لپاره په هر ډول جنایت لاس پورې کوي. زه د ستانکزي خبرې تاییدوم او پر ولس غږ کوم چې د نړۍ او ګاونډ هېوادونو ته اجازه ورنه کړي ترڅو په افغانستان د تروریزم تور پورې کړي.»
دا په داسې حال کې ده چې د مسکو فارمټ په ناسته کې د ګډون کوونکو هېوادونو استازو په افغانستان کې له ترهګرۍ سره پر مبارزې ټینګار کړی او په دې برخه کې یې ګډې سیمه ییزې همکارۍ مهمې بللې دي.
