د افغانستان اوسنی حالت تر بل هر وخت حساس بلل کیږي، د سیمې او نړۍ نظر دا دی چې د اوسني وضعیت د بدلون رول د افغانانو دی چې په کومه لاره تګ غواړي.
له افغانستانه د بهرنیو ځواکونو وتلو کره کېدو وروسته، دلته د کورنۍ جګړې او د روان سیاسي کشمکش د ډېریدو اندېښنې مخ په زیاتېدو دي.
د افغان سولې لپاره د امریکا ځانګړي استازي زلمي خلیلزاد چې ګانګرس غونډې ته ور بلل شوی و، د سناتورانو د پوښتنو په ځواب کې یې وویل: اوس د افغانانو مسوولیت دی چې اوږده جګړه او یا هم سیاسي توافق ټاکي.
خلیلزاد دغه راز وویل چې هیله لري افغان سیاسیونو به له تېرو تجربو درس اخیستی وي.
خلیلزاد وویل: ((هیله من یم هغوی د خپلو پخوانیو تېروتنو څخه چې روسان ووتل څه زده کړې وي. د زور له لارې په بل لوري د خپلو غوښتنو تپل مثبته پایله نلري. بر عکس د ثبات او پرمختګ مخه یې ډب کړې ده.))
خلیلزاد دا هم وویل چې عمومي اجماع دا ده چې ټول په زور سره د طالبانو له واک ته رسېدو سره مخالف دي.
خلیلزاد همدا شان په ټولو خواوو غږ وکړ چې له رامنځته شوي فرصت څخه ګټه واخلي.
هغه وویل: ((طالبان کولی شي چې د تاوتریخوالي په درېدو سره په سیاسي جریان واوړي او د سولې یوه هوکړه ومني. که طالبان د سیاسي هوکړې د ټېنګېدو په وړاندې خنډ شي او واک ته د رسېدو لپاره نظامي لاره غوره کړي، نو د امریکا او د متحدینو له مخالفت سره به یې مخ شي.))
له دې سره هممهاله د امریکا د بهرنیو چارو وزیر موجوده تشویشونو ته په اشارې ویلي چې یو لوری هم نه غواړي چې افغانستان کې کورنۍ جګړه پیل کړي.
هاخوا د امریکا دفاع وزارت افغان حکومت ته ور تر غوږ کړي چې د بهرنیو ځواکونو تر وتو وروسته دوی له افغان ځواکونو سره د هوایي ځواک په برخه کې مرسته نه کوي.
خو د دفاع وزرات ویاند تر لنډ ځنډ او غبرګونونو وروسته په خپله ټویټر پاڼه لیکلي چې تر اوسه په دې اړه وروستۍ پرېکړه نه ده شوې.
د امریکا ضد او نقیضې خبرې داسې مهال کې کېږي چې امریکا له طالبانو سره د هوکړې له مخې بشپړو وتلو په حال کې ده، خو دلته په کور دننه د جګړو فصل پیل او سنګرونه په ګرمېدو دي.
