دا زده کړیالان د یاد پوهنتون د ښوونې او روزنې پوهنځي اړوند له ریاضي، بیولوژي، کېمیا او فزیک له څانګو فارغ شوي دي.
تازه فارغو شویو ځوانانو غوښتنه وکړه،چې حکومت دې دوی ته د نورو لوړو زدهکړو تر څنګ د کار او خدمت فرصتونه هم برابر کړي.
یو تن فارغ شوی زده کړیال وايي:« زموږ هېله دا ده،چې دولت راته کاري فرصتونه برابر کړي او پر دندو مو وګوماري، ترڅو ټولنې ته چوپړ وکړو. موږ باید د ټولنې د اوږو بار ونه ګرځو، بلکې پر پښو یې ودرو.»
یو بل فارغ شوی زده کړیال بیا وايي:« له دولته مو غوښتنه دا ده،چې د ماسټرۍ برخه کې پر کوردننه یا بهر د زده کړه زمینه راته برابره کړي،ترڅو موږ له نورو هېوادونو سره ځان برابر کړو.»
د میرویس نیکه پوهنتون مشر روحالله مشال بیا له یادو فارغانو وغوښتل،چې نورې لوړې زدهکړې هم وکړي او په ملي احساس خلکو او هېواد ته خدمت وکړي.
مشال زیاته کړه:« شااوخوا ۴۵۰ زده کړیالان بریالي شوي دي،چې په هغې کې ۲۵۰ کسانو ثبت نام کړی دی. ځېنو تعطیل اخېستی او یو شمېر پرېښی دی. د دوی له کورنیو مو هېله دا ده،چې خپل اولادونه ښوونځیو، مدرسو او پوهنتونونو ته ولېږي.»
په همدې حال کې د زابل ولایت د اطلاعاتو او کلتور مشر شرافت ویاړ، تازه فارغ شویو زده کړیالانو ته د کار پیدا کولو په برخه کې د ژمنې تر څنګ وویل، دغه فارغان کولای شي،له دوی سره د پوهنې په برخه کې د ښوونکو په توګه کار وکړي،څو ښوونیز بهیر پياوړی کړي.
ویاړ زیاتوي:« د زابل ولایتي اداره دې ته ژمنه ده،چې نویو فارغ شویو ځوانانو ته د کار زمینه برابره کړي.»
د میرویس خان نیکه پوهنتون په ۱۳۹۶ لمریز کال په زابل کې تاسیس شو،چې اوسمهال دغه پوهنتون د اقتصاد، زراعت او ښوونې او روزنې درې پوهنځي لري،چې د بېلابېلو ولایتونو ۸۵۰ زده کړیالان په کې پر زده کړو بوخت دي.
د مسوولینو په خبره، په نژدې راتلونکې کې به په دغه پوهنتون کې د شرعیاتو، حقوقو او قابلګي پوهنځي هم فعال شي.
