د زابل مرکز کلات کې موټر بم چاودنې شل تنه وژلي او ۹٥ نور یې ټپیان کړي دي.
د زابل ولایتي شورا مشر، عطا جان حقبیان ویلي، د نن سهار په چاودنه کې لږ تر لږه ۲۰ تنه وژل شوي او ۹۵ نور ټپیان دي.
د نوموړي په خبره، ښايي لا هم ټپیان او مړي له کنډوالو لاندې وي.
ځینې سرچینو ویلي، چې چاودنه د زابل د ملي امنیت ریاست ته څېرمه شوې ده.
د برید مسوولیت وسله والو طالبانو منلی او د ملي امنیت ګڼ شمیر ځواکونو ته یې د مرګ ژوبلې اړولو ادعا کړې ده.
د چاودنې له امله شاخوا سیمو ته خورا زیان رسېدلی او ویل کېږي چې د کلات ښار روغتون کې ډېری ناورغانو ته هم مرګ ژوبله اوښتې ده.
د ښاغلي حقبیان په وینا بل دولتي روغتون قلات کې نشته او د همدې له امله خلک مړي او ټپیان شخصي روغتونونو ته وړي، ځکه د مرګ ژوبلې پوره شمېره نشته.
