زابل کې تر سلو زیات بند ښوونځي بیا پرانیستل شوي دي.
د زابل ځايي مسوولین او قومي مشران توانېدلي، چې د دغه ولایت په بیلابېلو سیمو کې تر سلو زیات بابه تړل شوي ښوونځي بیا د زده کوونکو پر مخ پرانیزي.
د سيمو اوسېدونکي که څه هم د یادو ښوونځیو په پرانیستلو سره خوښ دي، خو له دولت څخه د دغو ښوونځيو لپاره د لازمو امکاناتو غوښتنه کوي.
د چارواکو په خبره، د قومي مشرانو او ديني عالمانو په منځګړیتوب توانېدلي، چې هغه ۱۱۰ ښوونځي بیا پرانیزي، چې په بېلابېلو سيمو کې د بېلابېلو ستونزو له امله تړل شوي وو.
د زابل د پوهنې رییس نصرالله ذاهد وايي، په روان او راتلونکي کال کې به د ۱۶۵ ښوونځیو لپاره ودانۍ هم جوړې شي.
د زابل د پوهنې رییس نصر الله ذاهد داسې وویل (( په زابل کې زموږ له راتګ مخکې له دوه سوه زیات ښوونځي تړل شوي، موږ او د زابل قومي مشرانو په ګډه همکارۍ وتوانېدو چې ۱۱۰ بابه ښوونځي بېرته د زده کوونکو پر مخ خلاص کړو))
قومي مشران د تازه پرانیستل شویو ښوونځيو په فعالیت خوښي ښيي، خو له دولت څخه غوښتنه کوي، چې یادو ښوونځو ته د رسمي تشکیل او د ودانیو جوړولو په اړه اقدام وکړي.
د زابل د ولایتي شورا مرستیال اسدالله کاکړ بیا په دغه ولایت کې د نورو بندو ښوونځيو د پرانیستلو د ژمنې تر څنګ له دولته څخه د پوهنېز بهیر د کیفیت لوړولو غوښتنه کوي.
د پوهنې ریاست د چارواکو د مالوماتو له مخې په دغه ولایت کې ۲۲۴ ښوونځي شته، چې ۲۰۰ یې فعال او ۲۴ نور یې د ناامنیو تر څنګ د امکاناتو د نه موجودیت له امله تړلي پاتې دي.
