د زابل قومي مشران ګواښ کوي که د ښوونکو معاشونه ورنکړل شي ښوونځي به وتړي.
زابل کې ښوونکو ته له تېرو لسو میاشتو راهیسې معاش نه دی ورکړل شوی.
د دغه ولایت قومي مشران ګواښ کوي، که د دغه ښوونکو معاشونه ورنه کړل شي، د معارف ریاست دروازې به وتړي.
د پوهنې ریاست مسوولين بیا وايي، د پوهنې په چارو کې د ځينو مشخصو کړیو لاسوهنو یې د ښوونکو معاشونه ځنډولي دي.
لس میاشتې کېږي، چې د دغه ولایت د ښوونځیو لپاره ټاکل شوي ښوونکي، له معاش پرته ښوونځيو ته د تدریس په موخه ځي.
د زابل قومي مشران وايي، که د ښوونکو معاشونه ور نه کړل شي، تازه پرانیستل شوي ښوونځي به هم بیرته وتړل شي.
قومي مشرانو محمد عمر خان اطرافي، ملا عبدالباري او ډاکټر عصمت بلوڅ داسې وویل (( د قومي مشرانو، سپين ږیرو او علماوو په مرسته تړل شوي ښوونځي پرانستل شول، خو اوس ښوونکو ته معاشونه نه ورکوي چې دا به یو وار بیا د ښوونځیو د تړلو لامل شي،،،، ډېرو معالمانو ته یې تنخواوې نه دي ورکړي لس میاشتې وشوې چې معاشونه یې نه دي اخستي دوی دومره وس هم نه لري چې د کور اړتیاوې پوره کړي.))
د ولایتي شورا غړي هم د ښوونکو د ځنډني معاشونو په اړه اندېښنه ښيي او وايي، په مرکز کابل کې یو شمېر کړۍ نه پرېږدي، چې په ځينو ولایتونو کې پوهنیز بهیر وده وکړي.
د ولایتي شورا غړی مرتضي خان ناصري داسې وویل (( موږ ته ډېر ښوونکي راغلي چې دولت معاشونه نه ورکوي، دوی اړ دي چې خپلې دندې پرېږدي.))
د پوهنې رییس نصرالله ذاهد د ښوونکو د معاش د ځنډ ستونزه مني، خو وايي، د پوهنې په بهیر کې د یو شمېر کړيو لاسوهنې د دې ستونزې اصلي لامل دي.
دا په داسې حال کې ده، چې درې میاشتې وړاندې تر ۱۸ کلني ځنډ وروسته د دغه ولایت په بېلابېلو سيمو کې ۱۰۰ ښوونځي چې د ناامنیو او امکاناتو د کمښت له امله تړل شوي وو، بیرته پرانیستل شول.
د پوهنې ریاست چارواکو ژمنه کړې وه، چې د غو ښوونځيو ته د ودانیو تر څنګ د کتاب، مسلکي ښوونکو او نورو اړتیاوو پوره کولو لپاره یې هڅې پیل کړي او ډېر ژر به یادې ستونزې حل شي.
