د بریټانیا د دفاعي کمیټې پخوانی مشر جنرال ډیویډ ریچرډ،د خپل پوځي ماموریت یوه برخه یې په افغانستان کې هم تېره کړې، له بي بي سي سره په مرکه کې یې ویلي، لویدیځ باید دا ومني،چې اسلامي امارت په ۲۰ کلنه جګړه کې ماتې ورکړې او اوس د افغانستان حاکمیت د اسلامي امارت په لاس کې دی.
ریچرډ زیاته کړه:« حقیقت دا دی،چې هغوی موږ ته ماتې راکړې ده او موږ باید اوس دا حقیقت ومنو. هغوی اوس د افغانستان حکومت په لاس کې لري. هغوی د شااوخوا ۴۰ میلیونه وګړو مسوولیت پر غاړه لري.»
ریچرډ وايي، لویدیځ به اسلامي امارت اخر هم پر رسمیت پیژني، خو په خبره یې غوره دا ده،چې هغوی دا کار ژر وکړي.
هغه وايي، د جګړې د اصولو له مخې، د بریالیتوب تر څنګ باید خپله ماته هم په ورین تندي ومنل شي.
ریچرډ زیاتوي:« زه فکر کوم،چې لویدیځ به اخر هم د طالبانو حکومت پر رسمیت پیژني، که داسې وي، نو دا به ډېره غوره وي،چې دا کار ډېر ژر وشي. ژر له ځنډ څخه غوره دی. یو متل دی،چې که موږ په بري کې ورین تندی لرو،نو باید خپله ماته هم په ورین تندي ومنو.»
اخوا د ملګرو ملتونو ځینې مشران هم له اسلامي امارت سره د نړۍ پر تعامل ټینګار کوي او وايي، ټول ولس ته په ډله ییزه توګه سزا ورکول انصاف نه دی.
ډیوډ ریچرډ د بریټانیا حکومت ته د مشورې او سلا په توګه دا هم ویلي،اسلامي امارت داسې عناصر لري،چې له امله یې بریټانیا له هغوی سره تعامل کولای شي.
