په داسې حال کې، چې سرپرست حکومت په افغانستان کې ټول بشري حقونه خوندي بللي، خو تازه امريکايي چارواکي ادعا کوي چې دغلته پر ښځو او نجونو وضعه کړای شوي بنديزونه ګواښوونکي دي.
د افغان ښځو، نجونو او بشري حقونو په برخه کې د امریکا ځانګړې استازې رینا امیري د ملګرو ملتونو د سرمنشي له مرستیالې امنې محمد سره لېدنه کې، د افغان ښځو د ملاتړ او بشري حقونو په اړه خبرې کړي.
رينا امیري د افغان ښځو او نجونو پر وړاندې د سرپرست حکومت پالېسۍ ځپونکې ګڼلي او زياته کړې يې ده، چې د يادو پالېسو د تطبيق دوام د ښځو او نجونو حقونو پر وړاندې ګواښ دی.
هغې زیاته کړې:« د افغانستان ښځو پر وړاندې سخت دریځه پاليسۍ، په سيمه او بهر کې د ښځو حقونو ته ګواښ دی.»
هم مهاله د بښنې نړيوال سازمان د ملګرو ملتونو په نوښت په دوحې کې د افغانستان په اړه کېدونکې ناسته د عامو افغانانو او په ځانګړې توګه د ښځو حقونو دفاع لپاره غوره فرصت بللی دی.
بښنې نړيوال سازمان په خپره کړې اعلاميه کې د ياد سازمان د مشر ډيپروس موچینا له قوله ويلي، چې د بشري حقونو په برخه کې د نړيوالو چلن سوړ دی او نه شي کولی چې د بشري حقونو وضعيت ته په کتو خپل سوړ چلن جاري وساتي.
هغه زیاته کړې:« په دوحه کې د ملګرو ملتونو سرمنشي، د ملګرو ملتونو لوړ پوړي چارواکي او ټول ځانګړي استازي چې له سیمې او بهر څخه په دې غونډه کې ګډون کوي، باید ټینګار وکړي، څو طالبان ژر تر ژره ټول هغه بندیزونه چې پر ښځو او نجونو يې لګولي، لرې کړي او هغه ښځې چې په خپلسرې او ناقانونه توګه نیول شوي، بېرته خوشې کړي.»
په افغانستان کې د بشري حقونو په اړه دا اندېښنې داسې مهال دي، چې د ملګرو ملتونو د سرمنشي مرستياله ويګنا راجا د ښځو د پياوړتيا په اړه بحثونو لپاره کابل ته راغلې.
ویل کیږي چې نوموړې به له اقتصادي پلوه د افغان مېرمنو پر ځان بسیاینې، په ټولنه کې د هغوی پر ګډون او ځينو نورو مسايلو خبرو او بحثونو کې ونډه ولري.
خو د اسلامي امارت ویاند ذبیح الله مجاهد بیا وايي، د نړیوالو اندېښنې د افغان ښځو حقونو پر وړاندې ناسمې دي او برعکس د ښځو لپاره ارامه او خوندي فضاء رامنځته شوې.
دغه راز مجاد د امريکا په شمول د بشري حقونو يو شمېر مدافع بنسټونو هغه ادعاوې هم بې اساسه بولي، چې ګواکې په افغانستان کې د ښځو او نجونو پر وړاندې د حکومت پاليسۍ پر سخت دريځۍ ولاړې دي.
اخوا د ښځو د حقونو فعالانې وایي، ښځې نباید له ټولنې حذف شي او حکومت ته پکار ده، چې په دې برخه کې د نړيوالو د اندېښنو رفعه کولو لپاره په ټولو برخو کې ښځو ته د فعاليت برابره اجازه ورکړي.
دا په داسې حال کې چې قطر پلازمینه دوحه کې نن د افغانستان په تړاو ناسته جوړېږي او په کې به د افغانستان لپاره د ملګرو ملتونو د ځانګړي استازي پر ګومارلو سربېره د ګډونوالو له لوري د افغان ښځو او نجونو او په ټوله کې د بشري حقونو پر وضعيت بحثونه وشي.
