د خلیلزاد په مشرۍ امریکايي پلاوي په پاکستان کې له طالبانو سره کتلي دي.
رویټرز خبري اژانس لیکلي، د امریکا او طالبانو ترمنځ د سولې مذاکراتو له ځنډېدو وروسته په دې لیدنه کې دواړو لوریو خپل نظریات تبادله کړي او پاکستان ورته زمینه برابره کړې ده.
پاکستان ته د خلیلزاد په مشرۍ د امریکايي پلاوي او طالبانو ورتګ د افغان سولې په تړاو د په ټپه ولاړو خبرو د بیا پیل لپاره هیلې زیاتې کړي دي.
ویل کېږي، امریکا او طالبان د سولې خبرو بیا پیل ته لیوالتیا لري او دواړه غاړې باوري دي چې روانه جګړه د پوځي لارې نشي ګټلای او ښایي دغه کتنې د سولې خبرو د بیا پیل مقدمه شي.
طالبان بیا وایي، لس میاشتې یې خبرې کړې او بیا مذاکرات له سره نه پیلوي، خو خبرو ته چمتو دي چې ادامه ورکړي.
طالبان وایي، هغه وخت خپل بریدونه کموي کله چې امریکا پر دوی بریدونه بند کړي.
تازه یو ځل بیا امریکایي ولسمشر ویلي، طالبان یې د سختو بریدونو لاندې نیولي دي.
