عمر وايي:« اوميکرون لکه څرنګه چې دلته ملګرو هم په خپلو خبرو کې تشرېح کړ، نسبت د نورو بڼو ته د کورونا وبا بڼه دا ډېر ګواښوونکې ده، خو تر اوسه په افغانستان کې شکر الحمد الله هېڅ مريض نه دی ثبت شوی. نه دی لیدل شوی،چې ایا دا ناروغ په خپل بدن کې هغه ناروغي لري يانه. خو زموږ تدابير همدا دي،چې اول مو ولس ته ستاسې د ميډيا له لارې بيا د ملاصاحبانو له لارې، بيا مو د عامه پوهاوي له لارې مالومات ورکړي دي.»
عمر وايي، اوس مهال په ټول هيواد کې د کورونا وبا ۳۴ روغتيايي مرکزونه فعال دي او په خبره یې په دې برخه کې لا ډېر کار کوي.
عمر زیاتوي،تر اوسه اووه ميلیونه کسانو ته د کورونا وبا ضد واکسين تطبيق شوي او لا هم په ټولو ولایتونو کې د واکسين د تطبيق لړۍ روانه ده.
عمر وايي:« په ټولو ولايتونو کې کار ښه پر چټکۍ سره روان دی، له ټولو بنسټونو سره مو خبرې کړي دي، د کواکس له طريقه هم د يو لک اويا يا اتيا زره ډوزه واکسين راغی استرازينيکا. همدا راز د چين هېواد له لورې د درې میلیونه ډوزه واکسين مرسته هم ترسره شوه،چې يو میلیون یې رارسېدلی او دوه به یې هم نږدې وخت کې راورسېږي.»
په همدې حال کې د افغان جاپان روغتون سرطبيب طارق احمد اکبري په ډېری برخو کې د امکاناتو د کمښت یادونه وکړه او غوښتنه یې وکړه،که امکانات ورته برابر شي،نوې بڼه مهارولی شي.
اکبري زیاته کړه:« موږ څه داسې ستونزه نه لرو،چې نوې بڼه راځي يا څلورمه بڼه یې په داسې شکل راځي. موږ هغه کنټرولاوی شو، زموږ يوازنۍ ستونزه، دا ده،چې که موږ سره درمل نه وي، يا نور امکانات نه وي،نو څنګه به وشو کولای،چې په تش لاس باندې له کورونا وبا سره مبارزه وکړو.»
د افغان جاپان روغتون د مالوماتو له مخې،دا مهال پدې روغتون کې پنځه پنځوس ناروغان بستري دي،چې ۳۳ یې پر کورونا اخته دي او پاتې نور یې شکمن دي،چې ټیسټونه یې اخېستل شوي دي.
