Skip to content
وروسته له هغې،چې د هېواد په ځېنو ولایتونو کې د شري ناروغي زیاته شوه او لسګونه ماشومان یې د مرګ تر خولې ورسول، د روغتیا نړیوال سازمان د هېواد روغتیا وزارت او اړوندو ادارو سره پر ګډه د شري ضد واکسین کمپاین پیل کړ،چې د روانې مارچ میاشتې تر اوولسمې نېټې به دوام ومومي.
یاد سازمان رسینو ته په لېږل شوې خبرپاڼه کې ویلي، یاد واکسین د هېواد ۲۴ ولایتونو په ۴۹ ولسوالیو کې هغو ماشومانو ته لګول کیږي،چې عمرونه یې له شپږو میاشتو تر پنځو کلونو وي.
د واکسین په دې اوونیز کمپاین کې ټولټال ۱.۲میلیونه ماشومانو په دغو ولایتونو کې واکسین کیږي.
د روغتیا نړیوال سازمان د خبرپاڼې یوه برخه:« بدخشان،بادغیس،بغلان،بلخ،فاریاب، هلمند،هرات،جوزجان، کندهار، کاپیسا، خوست، کندز، لغمان، ننګرهار، نیمروز، نورستان، پکتیکا، پکتیا، پروان، سرپل، تخار، ارزګان، وردک او زابل.»
د شري ضد واکسین په دې کمپاین کې،چې ۹ زره ۲۰۰ رضاکاران په کې کار کوي، له مالي او لوجیسټیکي ملاتړ سربېره یې روزنه هم د روغتیا نړیوال سازمان د شري ناروغۍ د مهار ځانګړي صندوق له خوا ورکول کیږي.
روغتیاپالانو له خلکو غوښتي دي،چې خپل ماشومان دې د دې ساري ناروغۍ پر وړاندې واکسین کړي،تر څو یې د مرګ مخه ونیسي او د افغانستان پر روغتیایي سیسټم فشارونه راکم کړي.
دوی وایي، د شري ناروغي په هغو ماشومانو کې زیاته پیدا کیږي،چې د بدن ویټامن اې یې کمه وي، کم خواړه ورسیږي او نورو نارغیو یې د بدن معافیت کمزوری کړی وي.
افغانستان کې د روغتیا نړېوال سازمان استازی ډاکټر لو ډپینګ وايي:« په افغانستان کې د شري ناروغۍ روانه خپرېدا له دې امله د ژورې اندېښنې وړ ده،چې دلته خوارځواکي خورا لوړه ده. خوارځواکي د بدن معافیت سیسټم کمزوری کوي،خلک د ناروغیو پر وړاندې کمزوري کوي او په ځانګړي ډول ماشومان د شري په څېر ناروغیو له امله د مرګ تر خولې رسوي.»
د شري په تړاو ویل کیږي،که خوارځواکو ماشومانو ته د دې ناروغۍ دوه ډوزه واکسین ورکړل شي،د مرګ له ګواښه ژغورل کیږي.
افغانستان کې د روغتیا نړېوال سازمان استازی داکټر لو ډپینګ وايي:« زه له ټولو خلکو غواړم،تر څو خپلو ماشومانو ته د دې مرګونې خو مخنیوي وړ ناروغی د واکسین ډالی ورکړي او ژوند یې وژغوري. موږ له دوی غواړو،چې په خپلو سیمو کې د روغتیايي کارکوونکو ساتنه وکړي،ځکه دوی ستاسو د ماشومانو ساتنه کوي.»
د مالوماتو له مخې، د شري ناروغۍ د روان کال له پیل راهیسې چې ۷۴ ورځې کېږي، ۱۸ زره ماشومان یې نیولي،چې له امله یې ۱۴۲ تنه مړه شوي دي.
په داسې حال کې،چې د تېر کال له پیل راهیسې د دغې ناروغۍ د مثبتو پېښو شمېر ۴۸ زره ۳۶۶ او د مړېنو شمېر ۲۵۰ و. روغتیا نړیوال سازمان له دې مخکې په شپږو ولایتونو کې د واکسین دا کمپاین تطبیق کړی و،چې په ترڅ کې یې یو اعشاریه شپږ میلیونه ماشومان واکسین شوي ول.
