روسیې په افغانستان کې د روان وضعیت پړه پر امریکا اچولې

د روسیې بهرنیو چارو وزیر سرګي لاوروف ویلي، امریکا له طالبانو سره پر خپلو ژمنو عمل ونه کړ، ځواکونه یې په خپل وخت له افغانستانه ونه واېستل، چې بالاخره په افغانستان کې د تېر حکومت د پاشل کېدو لامل شو.

لاوروف ویلي، مخکیني ولسمشر محمد اشرف غني د واک شریکولو لپاره له منل شوې طرحې سره مخالفت وکړ، چې په پایله کې یې طالبانو خپلې جګړې تیزې او حکومت یې سقوط کړ.

د لاوروف په خبره، که امریکا پر خپلو ژمنو عمل کړی وای او د مخکیني حکومت مشران یې د دوحې هوکړې عملي کولو ته اړ کړي وای، نن به دا حالت نه و.

اوس لاوروف له اسلامي امارت تمه لري، چې د سیمې او نړۍ غوښتنې پوره کړي او افغانستان کې د سولې او ثبات په راوستو کې اغېزناک ګامونه پورته کړي.