له ایرانه د بهرنیو چارو وزیر حسین امیرعبدالهیان پر مشرۍ یو لوړ پوړوی دولتي پلاوی مسکو ته تللی دی.
په دغه پلاوي کې،چې د افغانستان لپاره د ایران ځانګړی استازی حسن کاظمي قُـمي هم ګډون لري،له خپل سیال ضمیر کابلوف سره یې کتلي دي.
قمي وایي، له کابلوف سره یې د سیمه ییزو همکاریو ترڅنګ، افغانستان کې د تلپاتې سولې او ترهګرۍ سره د مبارزې پر سر خبرې کړې دي.
قمي زیاته کړې:« نن مې مسکو کې د افغانستان لپاره د روسيې له ځانګړي استازي ضمیر کابلووف سره رغنده خبرې وکړې. سیمه ییزه همکاري، د تلپاتې سولې د ټینګښت هڅې او له ترهګرۍ سره مبارزه د خبرو د اجنډا په سر کې وو. ایران له خپلو ګاونډیو هېوادونو سره یو ځای د یوه خوندي او پرمختللي افغانستان ملاتړ کوي.»
بل خوا د لویدیځې اسیا لپاره د ایران د بهرنیو چارو وزارت مشر پر خپله ټویټر پاڼه لیکلي، چې دواړو استازو د افغانستان د وروستیو پرمختګونو په تړاو خبرې کړي او د ګاونډیو هېوادونو تر څنګ په افغانستان کې د ترهګرۍ پر وړاندې مبارزه کې د روسيې رول هم مهم بلل شوی دی.
د لویدیځې اسیا لپاره د ایران دبهرنیو چارو وزارت استازی سید رسول موسوي وايي:« د افغانستان لپاره د ایران او روسیې ځانګړو استازو په مسکو کې سره کتلي او د افغانستان په وروستیو پرمختګونو یې خبرې کړې دي. سیمه ییزې همکارۍ، په افغانستان کې د امنیت، سولې او ثبات په راوستلو کې د افغانستان د ګاونډیو هېوادونو او روسیې مهم رول او له ترهګرۍ سره مبارزه د غونډې له مهمو موضوعاتو څخه وو.»
ایران او روسیه سیمه کې دوه هغه هېوادونه دي،چې د امریکا د ضده له افغانستان سره ښې اړیکې پالي خو لا یې حاکم نظام په رسمیت نه دی پیژندلی او نه یې کومه لیوالتیا ښودلې ده.
بل خوا دواړه لوري داسې مهال په افغانستان کې د ترهګرۍ پر وړاندې پر ګډې مبارزې ټنګار کوي،چې د روس متحد هېواد تاجکستان له افغان خاورې وېره لري او خپله پوله او هرډول اړیکې یې افغانستان سره پرې کړي،خو اسلامي امارت بار بار ویلي، د افغانستان خاوره به د هېچا پر ضد نه کارول کیږي.
