په مسکو کې د کابل سفیر د روسیې له دولتي ټاس خبري اژانس سره په تازه مرکه کې پر ګڼو دوه اړخیزو موضوعاتو او له دې هېواد سره پر راتلونکو اړیکو غږېدلی.
ګلحسن حسن د روسیې ولسمشر ولادمیر پوتین له لوري د نوموړي باورلیک له منل کېدو راوروسته په لومړۍ مرکه کې ویلي، چې افغانستان غواړي د شانګهایهمکاریو په سازمان کې خپل فعال ګډون ته دوام ورکړي.
نوموړي له دې سازمان سره د همکارۍ د دوام په اړه د پوښتنې په ځواب کې ویلي، چې افغانستان په شانګهای سازمان کې د ناظر غړي په توګه د دې سازمان په ناستو کې د دوامداره ګډون غوښتنه کړې او د دې سازمان ډېرو غړو له قوله یې د شانګهای سازمان په چارو کې د خپل هېواد فعال ګډون عملي او ممکن بللی.
هغه ویلي د یاد سازمان په راتلونکو ناستو کې د افغانستان په ګډون حساب کوي.
په روسیې کې د افغانستان سفیر ګلحسن حسن وايي: « افغانستان د شانګهای همکاریو په سازمان کې ناظر هېواد دی او دې ته په کتو باید د دې سازمان په ناستو کې ګډون وکړي. … د یاد سازمان غړي هېوادونه دې پایلې ته رسېدلي، چې د شانګهای همکاریو سازمان په چارو کې په فعاله توګه د افغانستان راګډول عملي او ممکن دي.»
په ورته مهال حسن په افغانستان کې د برېښنا تولید په برخه کې د روسي کمپنیو د لېوالتیا خبر وکړی او ویلي يې دي، چې دغه کمپنۍ په پام کې لري په افغانستان کې له اوبو څخه د برېښنا د تولید په برخه کې همکاري وکړي.
هغه زياته کړې، یوشمېر دغه کمپنۍ لا وار دمخه افغانستان ته راغلي او له اړونده ادارو او کارپوهانو سره په دې دې اړه غږېدلي هم دي.
په روسیې کې د افغانستان سفیر ګلحسن حسن وايي: «
هو، روسي کمپنۍ په افغانستان کې د برېښنا د تولید برخه کې لېوالتیا ښيي. یو شمېر کمپنۍ وار دمخه افغانستان ته تللي او هلته له اړوند ادارو او کارپوهانو سره په دې اړه غږېدلي هم دي.»
د چارو شنونکي د شانګهای همکاریو سازمان کې د افغانستان د رول پراخېدل او په ناستو کې یې دوامداره ګډون د دې سازمان له غړو سره اړیکې پیاوړي او په سیمهيیز ډول د حکومت د مشروعیت په لاوده کې مرسته کوي.
دوی دغهراز په هېواد کې د برېښنا کمښت او ترې ولاړو شویو ستونزو ته کتو، د روسیې په شمول د هر بل هېواد پانګونه او دې برخې ته وده ورکول مهم اقدام بولي، چې دا پخپله په راتلونکي کې پر نورو هېوادونو د افغانستان د برېښنا اتکاء راکمول شي.
د سیاسي چارو شنونکی خلیلاحمد نادم وايي: « که افغانستان د دغه سازمان غړیتوب د څارونکي یا غړي په توګه بېرته ترلاسه کړي هم د افغانستان په ګټه وي او هم د دغه سازمان ځکه چې افغانستان د اسیا زړه دی او د افغانستان ثبات د اسیا ثبات دی او د افغانستان بې ثباتي سیمه بې ثباته کولای شي.»
روسیې کې د اسلامي امارت سفير داسې مهال د شانګهای همکاریو سازمان په ناستو کې د افغانستان فعال ګډون ته چمتووالی ښودلی او د راپور پر اساس د دې سازمان اکثریت غړو دغه احتمال ممکن بللی، چې له دې وړاندې د افغانستان په شمول هېڅ ناظر هېواد ته د ګډون بلنه نه ده ورکړل شوې.
په داسې حال کې چې افغانستان د ۲۰۱۲ز کال د جون په اوومه د ناظر په توګه د دې سازمان غړیتوب ترلاسه کړ خو واک ته د اسلامي امارت له بیاځلې رسېدو وروسته د افغان استازو ته پکې د ګډون بلنه ځکه نه ورکول کېده چې اوسنی حکومت د هېڅ هېواد له لوري په رسمیت نه و پېژندل شوی، خو اوس د روسیې له لوري د فعلي حکومت په رسمیت پېژندې دې چارې ته تر ډېره لار هواره کړې ده.
د امریکا سولې انسټیټوت له دې وړاندې د ياد سازمان په ناستو کې د افغانستان د نه ګډون ترشا اصلي لامل د شانګهای سازمان د اصلي غړو ترمنځ اختلافات بللي وو.
