په کابل کې د روسیې سفیر ډیمیتري ژیرنوف د بهرنیوچارو وزارت له سرپرست مولوي امیرخان متقي سره د لیدنې پرمهال د مسکو لپاره د افغانستان اسلامي امارت د نوماند سفیر منلو رسمي یادښت بهرنیو چارو وزارت ته سپارلی.
په دې لیدنه کې متقي هیله ښودلې چې له روسیې سره د ډېپلوماټیکو اړیکو نوی فصل به د دواړو هېوادونو ترمنځ همکاري لا پراخه کړي.
په ورته مهال، په کابل کې د روسیې سفیر تمه ښودلې چې د افغانستان او روسیې ترمنځ د ډېپلوماټیکې کچې لوړېدو سره به په ګڼو برخو کې د دواړو هېوادونه اړیکې مخ ته لاړې شي.
د بهرنیو چارو وزارت مرستیال ویاند ضیاء احمد تکل وايي: « ښاغلي ژیرنوف د افغانستان اسلامي امارت د بهرنیو چارو وزیر ته روسیې لپاره د افغانستان د نوماند سفیر د منلو رسمي یادښت وسپاره او هیله یې څرګنده کړه چې د ډپلوماتیکې کچې لوړېدو سره به د دواړو هېوادونو تر منځ اړیکې ګڼو برخو کې پرمختګ وکړي.»
د سیاسي چارو کارپوهان وايي، روسیه چې نه یوازې په سیمه بلکې په نړۍ کې هم مهم او زبرځواک هېواد دی، له دې هېواد سره د سیاسي اړیکو د کچې لوړېدل کولی شي د نړۍ پر کچه د افغانستان سیاسي باور زیات کړي او له دې سره به نور هېوادونه هم د افغانستان له حکومت سره لوړې کچې اړیکو جوړېدو ته را وړاندې شي.
د سیاسي چارو شنونکی ادریس محمدي ځاځی وايي:« افغان ولس به له لاسته راوړنو برخمن شي، کاري فرصتونه به زیات شي، اقتصادي برخه کې به صادرات او واردات زیات شي، په سیاسي برخه کې به نړۍ کې د اسلامي امارت اعتبار لا زیات شي او د نړۍ نور هېوادونه به هم زړه ښه کړي چې د اسلامي امارت سفیران ومني.»
ځينې نور بیا په دې باور دي چې له روسیې سره د ډېپلوماټیکو اړیکو پراختیا د افغانستان پر ګټه دي، خو باید هڅه وشي چې د سیمې او نړۍ له نورو هېوادونو سره هم پر متقابل درناوي ولاړې رسمي اړیکې ټینګې شي.
د سیاسي چارو شنونکی شهزاده مسعود وايي: « روسیه په سیمه کې یو لوی قدرت دی، څومره چې روسانو سره زموږ اړیکې ډېرېږي، دا زموږ د ملي منافع لپاره ګټه لري. زه تمه لرم چې داسې متوازنه پالیسي غوره شي چې نه یوازې له روسیې او سیمې سره، بلکې له ټولې نړۍ او سترو هېوادونو سره د متقابل درناوي په چوکاټ کې ښې اړیکې ولرو.»
له دې وړاندې د پاکستان بهرنیو چارو وزارت اعلان وکړ چې پرېکړه یې کړې له کابل سره د خپلو ډېپلوماټیکو اړیکو کچه د سفیر هغې ته لوړه کړي.
د اسلامي امارت حکومت د دې ګام ستاینه کړې او زیاتوي چې دوی به هم په ورته عمل سره په اسلام اباد کې د افغانستان سفارت شارژدافیر کچه سفیر ته لوړه کړي.
