تمه کېږي چې مسکو کې د افغان سولې په اړه د امریکا ، روسیې، چین او پاکستان څلور اړخیزه ناسته جوړه شي.
مسکو ته د طالبانو له ورتګ وروسته اوس ټاکل شوې څلور سره هېوادونه چین ،امریکا ،روسیه او پاکستان د افغان سولې پر سر خبرو ته کېني، هغه ناسته چې ټاکل شوې د راتلونکي اوونۍ په پيل کې مسکو کې جوړه شي.
روسې طالبانو سره د امریکا له ناکامه خبرو وروسته په ټینګار سره وویل چې دوی به د خبرو د بیا پیل لپاره خپلو هڅو او ملاتړ ته دوام ورکړي، اوس باور کېږي چې روسیه غواړي په دې سره طالبان له لاسه ور نه کړي.
د پوهنتون استاد خالد سادات داسې وویل (( روسیه په ټوله کې غواړي په طالبانو باندې کنټرول ولري هم د سولې خبرو کې او هم په جګړه کې، د جګړې بحث جلا دی خو اوس روسیه غواړي د سولې خبرو کې له طالبانو د یوې کتلې په توګه ګټه واخلي.))
څه موده وړاندې طالبانو روسې ته خپل سفر بریالی بللی و چې مسکو له امریکا سره د خبرو په برخه کې د طالبانو له دریځ ننګه کړې ده.
افغان حکومت او طالبانو د ناستې په اړه تازه څه نه دي ویلي، خو باور کېږي چې دا ناسته به د سولې درېدلی بهیر بیا پیل کړي او بل پلو به د باور جوړونې لپاره ښه پایله ولري.
په افغان سولې هغه هېوادونه خبرو ته کېني چې د دوی د جګړې د نیابت له امله لویه قرباني افغانان ورکوي.
د حکومت سیاسي او وسلوال مخالفین هم له دې غوره ګڼي چې بهرنیو هېوادونو سره افغانستان کې د جګړې حل لپاره یوه لار پیداکړي.
د ولسي جرګې غړی اسدالله شهباز داسې وايي (( هر هغه افغان چې ځان سیاسیون بولي، که هغوی د حکومت په راس کې دی او که له حکومت بهر او همدا شان طالبانو ته هم په کار ده چې د یو مسلمان او افغان په صفت له جګړې لاس واخلي او ټول په ګډه د سولې لپاره کار وکړي.))
اوس به ولیدل شي چې د افغان سولې پرسر درېدلې خبرې بیا پیلږي په داسې حال کې چې ټاکنې شوي او پایلو ته یې د خلکو انتظار پای ته نه دی رسېدلی.
ټاکنې د سولې په برخه کې یو خنډ یادیده چې له مخې لرې شوې او سوله چې باور کېده له ټاکنو وړاندې پایله ورکوي یو ناسمه وړاندوینه ثابته شوه.
