د افغانستان او پاکستان ترمنځ له جګړې او د قطر او ترکیې په منځګړیتوب د روانې اکټوبر میاشتې په ۱۹مه په دوحه کې د اوربند هوکړې له لاسلیک وروسته، دغه ګام د يو شمېر هېوادونو او نړیوالو سازمانونو له لوري ستایل شوی.
تر ټولو تازه غبرګون کې روسیې له دواړو خواوو غوښتي چې ستونزې د خبرو له لارې حل کړي او لا ډېرو همکاریو ته زمینه برابره کړي.
ایران، مصر او کوېټ هم په جلا جلا ډول هیله ښودلې چې د اوربند د هوکړې لاسلیک کېدل به تاوتریخوالی راکم او په سیمه کې امنیت او ثبات ته لاره هواره کړي.
د روسیې بهرنیو چارو وزارت ویاندې ماریا زاخارووا ویلي: « موږ د کابل او اسلاماباد ترمنځ د دوه اړخیز اوربند او د افغانستان او پاکستان ترمنځ کرښې په اږدو کې د ډزبندۍ له هوکړې چې د قطري او ترکي چارواکو په منځګړیتوب ترسره شوې، هرکلی کوو. موږ پر دواړو خواوو غږ کوو چې د ترهګرۍ ضد مسایلو په شمول د همکارۍ تعامل وغځوي.»
د اسلامي همکاریو سازمان هم د دې ګام له کبله دواړو لورو ته مبارکي ویلې او هیله یې ښودلې،چې دغه څه ګډ پوهاوي، همغږۍ او د ښو اړیکو پیل ته زمینه برابره کړي.
د اسلامي همکاریو سازمان په اعلامیه کې راغلي: « د اسلامي همکاریو سازمان هوکړې ته د رسېدو له کبله دواړو هېوادونو ته مبارکي وایي او هیله ښيي چې دا ګام وکړای شي ګډ پوهاوي او همغږۍ ته زمینه برابره، ګډ باور پیاوړی، د ښه ګاونډيتوب اړیکې پراخې او د ټولې سیمې سوله او ثبات ورسره تقویه شي.»
بل پلو، د بشري حقونو په برخه کې د ملګرو ملتونو ځانګړي راپور ورکوونکي بیا د افغانستان او پاکستان په وروستیو نښتو او جګړه کې د ملکیانو پر مرګ ژوبلې خواشینې ښودلې او د هغوی ژوند ته یې پر لومړیتوب ورکولو ټنیګار کړی.
ریچارډ بېنېټ د اختلافاتو د پېښېدو پر مهال د نړیوالو قوانینو عملي کول او رعایت ټولیز مکلفیت ګڼلی او وايي، له توپيري چلن پرته باید په جامع ډول عمل شي.
ریچارډ بېنېټ زیاته کړې: « په خواشینۍ سره چې په دې جګړو کې ملکیانو ته زیان واوښت. زه د زیانمنو له کورنۍ سره خواخوږي ښیم. ملکي وګړو ژوند ته باید لومړیتوب ورکړل شي. د نړيوالو قوانینو رعایت انتخابي عمل نه دی.»
دا هرڅه داسې مهال دي چې پر افغان خاوره د پاکستان پوځي رژیم له څو څو ځله بمباریو او هوايي حريم له نقض وروسته، د اسلامي امارت ځواکونو د دې هېواد پر پوځیانو انتقامي عملیات ترسره کړل چې په پایله کې یې د پاکستان پوځ ګڼې پوستې د لنډمهال لپاره ونیول شوې او شاوخوا ۶۰ پوځيان يې ور ووژل.
له دې اقدام وروسته د پاکستان پوځي رژیم د دې ماتې د جبران لپاره په کابل کې پر ملکي سیمې بمبار کې تر څلوېښتو زیات عام افغان شهیدان کړل.
