د ایران ولسمشر حسن روحاني وايي د ایران د حکومت ستره هیله دا ده چې ژر تر ژره په افغانستان کې دایمي ثبات او سوله راشي
حسن روحاني چې نن یې د هرات-خواف رېل پټلۍ په مناسبت په جوړو شوو مراسمو کې خبرې کولې وویل، ټوله سیمه او ټول ګاونډي هېوادونه په دې پوهېږي چې د افغانستان ثبات د ټولې سیمې د ثبات لپاره مهم دی.
هغه ټینګار وکړ چې افغانستان او ایران په خپلو کې تاریخي او پیاوړې اړیکې لري او ددې وخت را رسیدلی چې له شته فرصتونو او امکاناتو څخه د دې اړیکو د لا پراختیا او پیاوړتیا لپاره کار واخیستل شي.
حسن روحاني ددغه پټلۍ پرانیستل په ټوله سیمه کې یو ستر اقتصادي تحرک وباله او ټینګار یې وکړ چې د هرات-خواف رېل پټلۍ به افغانستان او ایران لا سره نږدې کړي، ایران به له مرکزي اسیا سره وتړي او همدا راز به افغانستان د ایران له لارې له اروپا او ترکیې سره وتړل شي.
