د تېرې جنورۍ میاشتې پر ۲۰مه نېټه د امریکا ولسمشر ډونالډ ټرمپ د يوه اجرایيوي فرمان په صادرولو سره امریکا ته د کډوالو لېږدولو پروګرام وځنډاوه، خو له دې پرېکړې ۱۲۰ ورځې وروسته د دې هېواد بهرنیو چارو وزیر اعلان کړی چې له درېيمو هېوادونو د هغو افغانانو لېږدولو پروسه نه ده لغوه شوې چې امریکا ته د تګ لپاره وړ شرایط لري.
مارکو روبیو دا څرګندونې د کانګرېس یوې ناستې ته کړې او ویلي يې دي، ډېر ژر به په دې برخه کې د لا زيات پرمختګ اعلان هم وشي.
روبیو په دې اړه ویلي: « موږ په دې اړه لاهم وروستۍ پرېکړه نه ده کړې چې د هغوی لپاره د وېزې پیسې ورکړو او که په خپل شخصي لګښت انتقال شي؟ دا دواړه مسایل لا تر څېړنو لاندې دي. هغوی چې له امریکا سره همکار پاتې شوي، د راتګ لپاره یې عملي پروسه کې پرمختګونه رامنځته شوي او دا هغه اقدام دی چې زموږ متحدین یې هم غوښتنه لري.»
د سرپرست حکومت له واکمنېدو راهيسې امریکا په کابل کې کونسلي خدمتونه نه لري او د اسنادو پروسېس پړاوونه او ويزه يې په درېيم هېواد کې طی مراحل کېږي.
امریکا له افغانستانه د کډوالو لېږدولو لپاره پاکستان، قطر، فلیپین، عربي امارات، او البانیه د درېيمو هېوادونو په توګه کاروي.
له دې سره هم مهاله ځينې افغان کډوال د امریکا بهرنیو چارو وزیر څرګندونو ته خوښ دي او وایي، امریکا دې د دوی لېږد بهیر بېرته ژر پیل کړي.
پاکستان کې دېره افغان کډواله طیبه رستاقي وايي:« افغان مهاجرین په دویمو هېوادونو کې له ګڼو ستونزو سره مخ دي، په ځانګړې توګه پاکستان کې له سختګیرانه قوانینو، د اسلام او راولپنډۍ له ښارونو وتل، د وېزو محدودیتونه دغه شرایط لا نور سخت کړي. په دې منځ کې د انتقال ورو لړۍ، د امریکا له خوا د دوسیو په ځنډ کتنه سبب شوي چې د مهاجرانو ترمنځ اندېښنې نورې هم زیات شي.»
د کډوالو د حقونو فعالان وایي، پاکستان د ډېرو افغان کډوال کوربه دی چې په کې د امريکا کېس لرونکي افغانان د پولیسو له لورې له سخت فشار سره مخ دي او ټینګار کوي چې امریکا دې خپل متحدین له پاکستان او نورو هېوادونو ژر انتقال کړي.
د کډوالو حقونو مدافع علي رضا کریمي وايي: « د امریکا متحده ایالتونو انساني او اخلاقي دنده ایجابوي چې د دغو کسانو او د هغوی د کورنیو امنیت تضمین شي.»
د رویټرز خبري اژانس د راپور له مخې، د ۲۰۲۱ کال له اګسټ وروسته ۲۰۰ زره افغان وګړي امریکا ته لېږدول شوي.
بل پلو، د سې شنبه په ورځ د افغان ایوک بنسټ په یوه پرانیستي لیک کې د امریکا له کانګرېس غوښتي چې روانې اوونۍ کې د بودیجې په اړه کېدونکې غونډه کې دې د افغان کډوالو پر وضعیت بحث ته هم لومړیتوب ورکړل شي.
په دې لیک کې راغلي چې څه باندې ۲۱۲ زره کسان په افغانستان کې او لسګونه زره نور د پاکستان او قطر په ګډون په ۷۵ هېوادونو کې په يوه ناڅرګند حالت کې امريکا ته د تګ په تمه ژوند کوي.
