د نور هېواد په څېر پکتیا کې هم غنم یو له مهمو کرنیزو توکو ګڼل کېږي چې تر ډېره یې د دې ولایت خلک په کرنه بوخت دي.
که څه هم سږ کال دلته کروندګر د خپلو حاصلاتو ښو پایلو ته خوښ دي، بیا هم غوښتنه کوي چې اړوند ادارې باید د کرنې د لا ودې لپاره له کروندګرو سره پراخې بنسټیزې مرستې وکړي.
کروندګر عبدالله وايي: « موږ غواړو سره راکړي، نوي اصلاح شوي تخمونه راکړي ترڅو آبادي او غله زیات شي. د غنمو دا نوي تخمونه ډېر ښه حاصل کوي، چاته یې چې ورکړي ترې راضي دي.»
کروندګر موسی خان وايي: « که دولت وي که موسسې وي، خو چې د سرې او اصلاح شویو تخمونو مرسته وکړي، دا به ډېر ښه شي.»
کروندګر طالب جان وايي: « پکتیا کې له غنمو سربېره نورې هم ډېر څه کېږي، مثلا ً ترکاري کېږي، رومیان او سویابین او نور ډېر څه ښه حاصل ورکوي.»
کروندګر داسې مهال د کرنیزې ودې لپاره د مرستو غوښتنه کوي چې د پکتیا کرنې اوبو لګولو او مالدارۍ ریاست مسوولاون وايي، دوی د همکارو موسسو په مرسته له بزګرانو سره د غنمو د اصلاح شویو تخمونو او کیمیاوي سرې مرسته کړې او د ورته نورو مرستو ډاډ ورکوي.
د نوموړي په خبره، له دې امله د غمنو سږنيو حاصلاتو کې ۱۵ سلنه زیاتوالی راغلی.
د پکتیا کرنې اوبو لګولو او مالدارۍ رییس سید امین هاشمي وايي: « موږ د پکتیا ولایت ټولو بزګرانو ته زېری ورکوو چې د تېر کال په څېر به بیا هم زرګونه بزګرانو ته اصلاح شوي تخمونه او سره ورسول شي. د اسلامي امارت کرنې وزارت او دغه راز موسساتو ژمنه کړې چې روان کال به له کروندګرو سره همکاري ډېره شي.»
د پکتیا ډېری ختیځې ولسوالۍ د ګرم سېرو سیمو په ډله کې شمېرل کېږي. د دغو ولسوالیو د غنمو حاصلات څه موده وړاندې ترلاسه شوي، خو د مرکز ګردېز په شمول څو ولسوالیو کې یې اوس مهال کروندګر د حاصلاتو په را ټولولو بوخت دي.
