د لغمان ولایتي ادارې مسوولینو د یوه رسنیز کنفرانس پر مهال وویل چې روان کال په دې بریالي شوي چې د کال له پیله تر اوسه د حکومت او مرستندویه موسسو په مالي لګښت د ٢٨٧ میلیونه افغانیو او نږدې٣٢ میلیون ډالرو په لګښت ٨٧ پروژو چارې پیل کړې وې چې ځینې یې بشپړې شوې او ځینې یې لا تر کار لاندې دي.
د لغمان ولایت مرستیال محمد یوسف جمالزی وايي: « د روان کال په لومړیو دوو ربعو کې د ځینو موسسو له لارې هم ۶۴ بېلابېلې پروژې عملي شوې دي. په دې پروژو کې خلکو ته نغدې پيسې هم ورکړل شوې، سړکونه، واړه او لوی چک ډیمونه جوړ شوي، همدارنګه د اوبو زېرمې او داسې نورې لویې او کوچنۍ پروژې پلې شوې دي.»
مسوولینو د دې کنفرانس پرمهال دا هم زیاته کړې چې د کابل جلال اباد سړک د خوندیتوب او پر دې لاره د ټرافیکي پېښو د کمښت په موخه، د دې سړک د ترمیم چارې هم پیل شوې دي چې ۱۰ میلیونه افغانۍ لګښت پرې راځي.
د لغمان ولایت مرستیال په دې اړه وايي: « د کابل – جلال اباد عمومي سړک د ترمیم پروژه چې قرارداد یې په کابو ۱۰ میلیونه افغانیو شوی او چارې یې عملا ً پیل شوې دي. د کابل – جلال اباد سړک د خوندیتوب په موخه د فلزي کټارو جوړولو پروژه چې لس میلیونه افغانۍ پروژه ورته منظوره شوې او دا مهال د سروې او ډيزاین په پړاو کې ده.»
لغمان مېشتي په دې ولایت کې د دغو پروژو له پلي کېدو خوښ دي، خو د کرنې، مالدارۍ، ښاري پراختیا او بې کارۍ ختمولو په برخه کې د لا نورو پروژو د پلي کېدو غوښتنه کوي.
د لغمان اوسېدونکی عبد الواحد وايي: « له دولت خوښ یم چې دا پروژې یې پيل کړې دي او باید نورې هم پيل کړی. په دې پروژو کې ګڼو کسانو ته د کار زمینه برابره شوې ده.»
د لغمان اوسېدونکی مالیار وايي: « موږ د ویالو جوړولو او هغو ځایونو کې د سړکونو غوښتنه کوو چې سړک نه لري. همدارنګه موږ د شاهي کانال په څېر نورو کانالونو ته اړتیا لرو، ترڅو مو ځمکې خړوبې شي.»
باید یاده شي چې د دې کنفرانس پرمهال مسوولینو لغمان کې د کډوالو ستونزو ته رسېدو په موخه دوی ته د سرپناه لپاره د یونیم زر استوګنیزو نمرو د ورکړې خبره هم وکړه چې نږدې وخت کې به په دې ولایت کې له کډوالۍ پر راستنو شویو کورنیو ووېشل شي.
