د سې شنبې په ورځ(د سلواغې ۲۱ مه) ناوخته شاوخوا څلور نیمې بجې د کندهار ښار د دویمې حوزې اړوند د غالیو او توشکو په یوه مارکېټ کې اور ولګېد چې د شدت له امله یې مهارولو ډېر وخت ونیو.
عیني شاهدان وايي، دغه اور د برېښنا شارټۍ له امله لګېدلی و او څو ساعته یې دوام وکړ.
د کندهار ښار اوسېدونکی سردار احمد وايي: « د مازدیګر شاوخوا څلور بجې وې چې د غالیو او توشکو په دې درې پوړیزه ودانۍ کې اور ولګېده. اورلګېدنه په زېرخانه کې د برېښنا شارټۍ له امله رامنځته شوه. د اور وژنې ټیم په دوه درې ساعتونو کې اور مړ او کنټرول کړ.»
د کندهار اوسېدونکی نور احمد اغا وايي: « دې کسانو ته ډېر زیان واوښت او باید څه مرسته ورسره وشي. دولت باید د دوی لاسنیوی وکړي.»
مسوولین وايي، د غالیو مارکېټ کې دغې اورلګېدنې له امله هم ۲۸ میلیونه افغانۍ زیان اوښتی، خو د ۱۵۰ میلیونه افغانیو د زیان مخه نیول شوې مګر د توشکو یوه منډوي کې اورلګېدنې بیا ډېر مالي زیان اړولی، خو لایې کره کچه نه ده په ډاګه شوې.
د کندهار امنیه قوماندانۍ ویاند ملا اسدالله جمشېد وايي: « د کندهار ښار دویمې امنیتي حوزې د زاړه کابل بانک په ساحه کې د توشک جوړونې شرکت کې د برېښنا شارټۍ له امله اورلګېدنه رامنځته شوه. د کندهار امنیه قوماندانۍ، هوايي ډګر او قول اردو د اور وژنې ټیمونو په ګډه همکارۍ اور وژنه مهار کړه. د اور وژنې په عملیاتو کې د اور وژونکي ټیم دوه تنه کارکوونکي سطحي ژوبل شوي او له امله یې ۲۸ میلیونه افغانۍ زیان اوښتی.»
په اورلګېدنو کې زیانمن شوي کسان بیا وايي، ټوله هستي يې د اور خوراک شوې او حکومت دې له دوی سره د زیان په جبران کې مرسته وکړي.
زیانمن شوی عبدالکبیر وايي: « زموږ ټول دوکان سوځېدلی او هېڅ نه دي پاتې. له دولت د مرستې غوښتنه کوو، ترڅو خپل کاروبار بېرته له صفر څخه پيل کړو.»
زیانمن شوی محمد امان وايي: « زما کارخانه د برېښنا شارټۍ له امله وسوځېده، له حکومت د لاسنیوي غوښتنه کوم. موږ ته تر ۴۰۰ زرو ډالرو زیات زیان رسېدلی دی.»
په کندهار کې روانه اوونۍ درې اورلګیدنې رامنځته شوې او له امله یې درانه مالي زیانونه پر ځای پاتې دي.
درې ورځې وړاندې د کندهار صنعتي پارک د پنبې یوې فابریکې کې هم اورلګېدنه رامنځته شوې وه چې پر مهال ۶۳ میلیونه افغانۍ مالي زیات واوښت.
