له تېرو څو کلونو راهیسې په ايران او پاکستان کې مېشت افغان کډوال له دوى سره د تاوتریخوالي او د پوليسو پر سخت چلن نيوکه کوي او ځينې یې وايي، سره له دې چې قانوني اسناد لري د ايراني پوليسو له خوا وهل کېږي او زنداني کېږي.
د کډوالو او بېرته راستنېدونکو چارو وزارت معین له شمشاد سره مرکه کې ویلي، په پاکستان او ایران کې نږدې ١١زره افغانان بندیان دي.
مولوري عبدالرحمان راشد زیاتوي، تراوسه پورې د یادو هېوادونو له بندخونو نږدې ٦ زره بندیان آزاد او هېواد ته رالېږدول شوي دي.
د راشد په خبره، دغه هېوادوال د بېلابېلو جرمونو په تور ګاونډیو هېوادونو کې نیول شوي او سرپرست حکومت هڅه کوي چې قضیې یې وڅېړي او هېواد ته یې راولېږدوي.
راشد په دې اړه وايي: « تقریبا ً ۲ زره ۵۰۰ تنه مهاجران د پاکستان په زندانونو کې شته دي؛ مخکې دغه کچه له ۵ تر ۶ زرو وه، چې د سفارت او مهاجرینو د اتشو د ډېپلوماټیکو هڅو په پایله کې ډېری هغه آزاد شول. همدارنګه په ایران کې مو هم شاوخوا ۸ زره بندیان لرل. د اسلامي امارت ورغلي پلاوي د هغوی له چارواکو سره خبرې وکړې چې په پایله کې یې له موږ سره د ۱ زر ۵۰۰ تنو بندیانو د سپارلو ژمنه کړې چې افغانستان ته به لېږدول کېږي.»
په پاکستان کې د افغان کډوالو د نیولو او بېرته راستنولو لړۍ تېر کال په اکټوبر میاشت کې پيل شوه او د مسوولینو په خبره، په دې موده کې له پاکستان ۵۰۰ زره افغان کډوال او له ایران هم تر ۱میلیون ډېر افغانان هېواد ته را ستانه کړای شول.
د کډوالو او راستنېدونکو چارو وزارت مرستیال زیاتوي: « شاوخوا ۵۵۰ زره مهاجرین له پاکستان راستانه شوي او شاوخوا ۱ میلیون ۷۰۰ زره له ایران هېواد بېرته راستانه شوي دي.»
دا په داسې حال کې ده چې تېره اوونۍ پاکستان د کورنیو چارو وزارت له ټولو ناقانونه کډوالو او د افغان تابعیت یا (اې .سي.سي) کارټ لرونکو کډوالو غوښتي چې د روان ۲۰۲۵ کال د اپرېل تر لومړۍ نیټې مخکې دغه هېواد پرېږدي.
راشد دا پریکړه غندي او له پاکستان او ایران غواړي چې د کډوالۍ نړیوالو اصولو او قوانینو ته درناوی وکړي.
راشد په دې اړه وايي: « باید مهاجرین دا ډول ونه ځوروي، موږ د افغان مهاجرانو له کوربه هېوادونو او په ځانګړې توګه له ایران او پاکستان چې ورسره ګډې پولې، دیني او ژبني مشترکات لرو، غوښتنه کوو چې زموږ له مهاجرانو سره ښه چلن وکړي.»
د کډوالو او بېرته راستنېدونکو چارو وزارت معین مولوي عبدالرحمن راشد له شمشاد سره په دې مرکه کې دغه راز ویلي، په نږدې راتلونکي کې به په هېواد کې دننه هغو کډوالو او بې ځایه شویو ته چې سرپناه نه لري، ځمکې ووېشل شي او په وینا یې، ګاونډیو هېوادونو سره په خبرو بوخت دي ترڅو افغان کډوال په زور او جبر ونه باسي.
